Sun’iy intellekt bozoridagi eng yirik hamkorliklardan biri endi sud zaliga ko’chdi. Apple OpenAI’ga qarshi da’vo arizasi kiritib, kompaniyani o’zining maxfiy texnologiyalarini noqonuniy o’zlashtirganlikda ayblamoqda. Gap ChatGPT yoki AI modellari haqida emas. Mojaroning markazida OpenAI ishlab chiqayotgan yangi AI qurilmalari turibdi.
Apple’ning da’vosiga ko’ra, kompaniyaning bir nechta sobiq muhandislari OpenAI’ga ishga o’tishdan oldin Apple’ning maxfiy hujjatlari, apparat dizaynlari va ishlab chiqarish jarayonlariga oid ma’lumotlarni noqonuniy nusxalab olgan. Sud hujjatlarida OpenAI apparat bo’limi rahbari Tang Tan hamda sobiq Apple muhandisi Chang Liu nomlari tilga olingan.
Apple bu ma’lumotlar OpenAI’ning yangi AI qurilmalari ustidagi ishlanmalarida qo’llanilgan bo’lishi mumkinligini ta’kidlamoqda. Ayniqsa, OpenAI Jony Ive asos solgan io startapini sotib olganidan so’ng apparat yo’nalishidagi ishlanmalarni tezlashtirgani bu da’voga qo’shimcha e’tibor qaratilishiga sabab bo’ldi.
Kompaniya suddan OpenAI’ga Apple’ning tijorat sirlaridan foydalanishni taqiqlashni, olingan ma’lumotlarni qaytarishni hamda yetkazilgan zarar uchun kompensatsiya undirishni so’ramoqda.
OpenAI esa barcha ayblovlarni rad etdi. Kompaniya o’z bayonotida boshqa kompaniyalarning maxfiy texnologiyalariga ehtiyoj yo’qligini va Apple’ning da’volari asossiz ekanini bildirdi. Hozircha sud yakuniy qaror chiqarmagan. Demak, Apple tomonidan ilgari surilgan ayblovlar hali isbotlanmagan.
