Firstpoint VC venchur kompaniyasi sun’iy intellekt (AI) imkoniyatlaridan foydalanadigan o‘yin va ko‘ngilochar startaplarga investitsiya kiritish uchun maqsadli hajmi €50 million bo‘lgan yangi venchur fondni tashkil etilganini e’lon qildi. Fond asosan Turkiya, Sharqiy Yevropa, Janubi-Sharqiy Osiyo va Markaziy Osiyoning jadal o‘sayotgan bozorlariga e’tibor qaratadi.
Fondga investitsiyalar va operatsion boshqaruv sohasida jami 30 yillik tajribaga ega bo‘lgan bosh hamkorlar — Burak Yilmaz va Mayk Fisher rahbarlik qilmoqda. Ularning ish tajribasi 20 dan ortiq mamlakatni qamrab olgan bo‘lib, o‘tmishda WePlay Ventures, Square Enix, Epic Games, Amazon, Bandai Namco, SEGA va Microsoft kabi global gigantlarda rahbarlik lavozimlarida faoliyat yuritishgan.
Hozirda global o‘yin va ko‘ngilochar bozori taxminan $600 mlrdga baholanmoqda va bashoratlarga ko‘ra, kelgusi besh yil ichida bu ko‘rsatkich $1 trlnga yetishi mumkin. Ushbu segmentga mobil va videoo‘yinlar, game-tech, interaktiv media, iste’mol ilovalari hamda sport, musiqa va texnologiyalar chorrahasidagi yechimlar kiradi. Bunday manzara fonida sun’iy intellekt ishlab chiqish jarayonlari, foydalanuvchilar o‘sishi va loyihalarni masshtablash (skayling) usullarini qayta belgilab beruvchi transformatsion kuch sifatida namoyon bo‘lmoqda.
AI va rivojlanayotgan bozorlar
Firstpoint VC strategiyasi AI, geyming va shiddat bilan o‘sayotgan bozorlar kesishmasida qurilgan. Fond Turkiya o‘yin ekotizimida o‘zini oqlagan muvaffaqiyatli modelni Yevropa va Osiyoning boshqa rivojlanayotgan iqtisodiyotlarida ham samarali qo‘llash mumkin degan tamoyilga tayanadi.
- Burak Yilmaz avvalroq Turkiyaning faqat o‘yin sanoatiga ixtisoslashgan ilk fondi — WePlay Ventures kompaniyasiga rahbarlik qilgan. Faoliyati davomida u 17 mamlakatdagi 90 dan ortiq o‘yin startaplari bilan ishlagan. U, ayniqsa, tadbirkorlik salohiyati yuqori bo‘lgan, ammo institutsional kapital endi shakllanayotgan bozorlarda ekotizim qurishga e’tibor qaratgan.
- Mayk Fisher esa Final Fantasy, Tomb Raider, Fortnite, Unreal Engine va Xbox kabi jahonga mashhur franchizalarni boshqarib, ulkan operatsion tajriba to‘plagan. AQSh, Buyuk Britaniya va Yaponiyadagi korporativ faoliyatidan tashqari, u Janubiy Kaliforniya universitetining Games and Interactive Media dasturi o‘qituvchisi.
Bosh hamkorlardan tashqari, Firstpoint VC nufuzli Maslahatchilar kengashi va venchur hamkorlar tarmog‘ini shakllantirdi. Kengash tarkibidan Jen Maklin (Xbox sobiq bosh menejeri), Lyuk Dikken (Take-Two Interactive’da AI yo‘nalishi sobiq rahbari) va Bora Kochyigit (Riot Games sobiq hududiy menejeri) o‘rin olgan.
Fondning investitsion mantiqi «Turkiya muvaffaqiyat hikoyasi»ga asoslanadi. So‘nggi o‘n yil ichida Turkiya uchta «unicon» — Peak Games, Dream Games va Loom Gamesni yetishtirib chiqardi va bu natijaga ko‘plab boshqa sohalarga qaraganda tezroq va kamroq kapital evaziga erishdi. Firstpoint shunga o‘xshash tarkibiy omillar hozirda quyidagi hududlarda ham shakllanayotganiga ishonadi:
- Polsha: PC va konsol geymingi bo‘yicha yetakchi markaz sifatida o‘z mavqeyini mustahkamlamoqda.
- Vyetnam: Mobil o‘yinlar yuklanishi bo‘yicha jahon yetakchisiga aylanib bormoqda.
- Markaziy Osiyo: Kuchli iste’dodlar bazasi va strategik geografik joylashuvi tufayli raqamli investitsiyalar uchun istiqbolli yangi yo‘nalish sifatida ko‘rilmoqda.
