Sun’iy intellektga asoslangan turargohlarni boshqarish platformasi — OpenSpot, Sarmo Ventures venchur jamg‘armasidan $100,000 miqdorida sarmoya jalb qildi. Ushbu investitsiya raundi yakunlari bo‘yicha kompaniyaning bozor qiymati $6 million deb baholandi.
Startap an’anaviy parkovka infratuzilmasini shunchaki passiv aktivdan boshqariladigan va yuqori daromad keltiruvchi manbaga aylantirmoqda. OpenSpot — BMTTD (UNDP) ko‘magida MOST C-Space Hub va SQB Ventures tomonidan tashkil etilgan Investment Readiness Accelerator (IRA) Tashkent dasturi birinchi oqimining bitiruvchisi hisoblanadi.
Tadqiqotlarga ko‘ra, bugungi kunda avtoturargohlarning 20–30% qismi maqsadsiz foydalanuvchilar tomonidan band qilinadi. Bu nafaqat daromad yo‘qotilishiga, balki xizmat ko‘rsatish sifatining pasayishiga ham sabab bo‘ladi. OpenSpot ushbu muammoni sun’iy intellekt (AI), IoT va real vaqtdagi tahliliy ma’lumotlarni integratsiya qilish orqali hal etmoqda.
Boshqaruv tizimidan tashqari, platforma foydalanuvchilar uchun ham qulaylik yaratadi: haydovchilar bo‘sh joylarni oldindan topishlari va band qilishlari mumkin, bu esa joy qidirishga ketadigan vaqtni keskin qisqartiradi.
Bozordagi barqaror o‘sish
Hozirda startap o‘zining jadal va barqaror rivojlanayotganini quyidagi ko‘rsatkichlar bilan isbotlamoqda:
- ~$500,000 ARR: Yillik takrorlanuvchi daromad;
- Xalqaro qamrov: Markaziy Osiyo, AQSh (Kaliforniya) va Mo‘g‘ulistonda muvaffaqiyatli pilot loyihalar va joriy etish jarayonlari;
- B2B talabi: Korporativ mijozlar tomonidan tasdiqlangan talab va ishonch.
Eslatib o‘tamiz, kompaniya bundan avval AQSh venchur jamg‘armasidan $170,000 miqdorida investitsiya jalb qilgan edi.
Navbatdagi marra sari
Yangi jalb qilingan mablag‘lar Markaziy Osiyo va AQSh bozorlarida faoliyatni kengaytirishga yo‘naltiriladi. Jamoaning maqsadi — kelasi yilga qadar ARR ko‘rsatkichini $3 millionga yetkazish va Seed-raundga tayyorgarlik ko‘rishdir.
Dias Kojatayev, MOST IT Hub rahbari va MOST C-Space Hub hammuassisi:
«OpenSpot — aniq iqtisodiy modelga ega va muayyan infratuzilmaviy muammoni hal qila oladigan startapning yaqqol namunasidir. IRA Tashkent dasturi davomida jamoa investitsiyalarga tayyorlikning yuqori darajasini ko‘rsatdi: B2B segmentiga aniq fokus, tasdiqlangan traction va xalqaro miqyosda kengayish salohiyati. Bunday loyihalar mintaqadagi texnologik yechimlarning yangi sifat standartlarini belgilab bermoqda.»
