O‘zbekiston telekommunikatsiya bozorida yirik xususiylashtirish jarayonlaridan biri o‘z yakuniga yetdi. “Universal Mobile Systems” MChJ (Mobiuz brendi) ustav kapitalidagi 100 foiz davlat ulushini sotish bo‘yicha o‘tkazilgan savdolarda xorijiy konsorsium g‘olib deb topildi.
Mobiuz operatorining xususiylashtirilishi haqida avvalroq xabar berilgan edi. Xususan, o‘tgan yilning yozida Bloomberg nashri o‘z manbalariga tayanib, O‘zbekiston hukumati kompaniyani qariyb $300 millionga sotishni rejalashtirayotgani haqida insayd bo‘lishgandi. O‘shanda xususiylashtirish jarayoniga Qatar, Saudiya Arabistoni, Ozarbayjon va Yevropa investorlari dastlabki qiziqishni bildirgani aytilgan edi.
Prezident Shavkat Mirziyoyevning tegishli qarorlariga muvofiq boshlangan ushbu jarayonda Davlat aktivlarini boshqarish agentligi xalqaro ochiq savdolarni tashkil etib, yetakchi konsultant sifatida «Rothschild & Co» hamda «KPMG» kompaniyalarini jalb qilgan edi.
Bitim tafsilotlari
Yakuniy savdo natijalariga ko‘ra, kutilganidan ham yuqoriroq qiymat qayd etildi va Mobiuz kompaniyasining bahosi $351 million AQSh dollari darajasida tasdiqlandi.
Tanlov yakunida AQShning “McKim and Company” kompaniyasi boshchiligidagi moliyaviy investorlar va sohaviy texnologik hamkor “JVR Enterprises LLC” (DBA – “JVR Capital Group”) ishtirokidagi konsorsium taklifi g‘olib deb topildi.
Ushbu yirik kelishuv nafaqat sotib olish qiymati, balki kiritiladigan investitsiyalar ko‘lami bilan ham ahamiyatlidir. Yangi investorlar tomonidan kompaniyaga yana $500 million AQSh dollarigacha qo‘shimcha investitsiya kiritish rejalashtirilgan.
20,9% lik bozor ulushiga va qariyb 7,8 million nafardan ortiq abonentga ega bo‘lgan Mobiuz’ning g‘arb kapitali qo‘liga o‘tishi mamlakat raqamli ekotizimida yangi davrni boshlab beradi. Rejalashtirilgan yarim milliard dollarlik investitsiya oqimi mamlakatdagi raqamli infratuzilmani yangilash, internet sifatini tubdan yaxshilash va zamonaviy 5G texnologiyalari qamrovini tezkorlik bilan kengaytirishga yangi, kuchli turtki berishi kutilmoqda.
