Toshkent shahrida innovatsiyalar sohasidagi eng yirik xalqaro tanlovlardan biri — Global Startup Awardsning mintaqaviy final bosqichi bo‘lib o‘tdi. Tadbir ICTWEEK 2025 doirasida tashkil etilib, Afg‘oniston, Qozog‘iston, Qirg‘iziston, Mongoliya, Pokiston, Tojikiston, Turkmaniston va O‘zbekistondan startaplar, investorlar, ekspertlar hamda ekotizim vakillarini bir joyga jamladi.
G‘oliblar orasida:
- Yil startapi — HyperApp
- Eng yaxshi yangi startap — OINA AI
- Eng yaxshi medtech startap — AIDENTIS
- Eng yaxshi fintech startap — MoliyAI
- Eng yaxshi yoshlar startapi — Coursemon
- Yilning inklyuzivlik namunasi — Asem Bolatjan
2012-yilda tashkil etilgan GSA tanlovi bugungi kunga qadar 120 dan ortiq mamlakatdagi texnologik tadbirkorlarni birlashtirib kelmoqda. Shu vaqt ichida tanlovga 160 mingdan ortiq ariza topshirilgan va o‘nlab muvaffaqiyatli loyihalar global bozorga chiqishga erishgan. Ular orasida umumiy qiymati 64 milliard dollardan oshadigan 16 ta “unicorn” startaplar ham mavjud.
Final dasturida asosiy ma’ruzalar, panel muhokamalari va investorlar bilan uchrashuvlar bo‘lib o‘tdi. Spikerlar orasida GSA hammuassisi Kim Balle hamda Startup Genome eksperti Kristofer Xeyli ham ishtirok etdi. Kristofer Xeyli Markaziy Osiyo, xususan Toshkent startap ekotizimining tezkor rivojlanayotganini alohida ta’kidladi.
Tanlov yakunlariga ko‘ra, mintaqaning eng yaxshi loyihalari aniqlandi.
Manba: IT Park
