MOST Holding va Allosta Partners Toshkentda taniqli tadbirkor va investor Marg‘ulan Seysembay ishtirokida yopiq biznes uchrashuvini tashkil etdi. Tadbirda O‘zbekiston va Markaziy Osiyoning 130 nafar biznes egasi, investor, aksiyador, CEO va C-level rahbarlari qatnashdi.
Uchrashuvning asosiy mavzusi biznesni tizimli boshqarish, kompaniya qiymatini oshirish hamda uzoq muddatli kapitalizatsiyani ta’minlash bo‘ldi. Ishtirokchilar kompaniyani egasining doimiy ishtirokisiz rivojlantirish, tezkor fikr-mulohazaning biznesdagi o‘rni va investitsiyalarni kompaniyaning barqaror o‘sish vositasi sifatida qo‘llash masalalarini muhokama qildi.
Dastur doirasida Marg‘ulan Seysembay va MOST Holding CEO’si Pavel Koktishev ishtirokida «2026-yilda biznes miqyosini kapitalizatsiyaga qanday aylantirish mumkin» mavzusida Fireside Chat bo‘lib o‘tdi. Shuningdek, Seysembay Allosta Partners faoliyati hamda maxsus investitsion vaziyatlar (special situations) bozorining imkoniyatlari haqida so‘z yuritdi.
Tadbir davomida Investment Readiness Accelerator Tashkent akseleratsiya dasturi ishtirokchilari — Onay OQU, Bigmart.uz, Screenix AI, ORDO Education va Uspace o‘z texnologik yechimlarini investorlar oldida taqdim etdi.
