25-iyul kuni Toshkentdagi U-Enter markazida Uzbekistan Founder Portrait 2026 tadqiqotining natijalari taqdim etildi. Stanbase tomonidan o‘tkazilgan ushbu tadqiqot O‘zbekiston startap ekotizimining bugungi holati, asoschilarning profili hamda ularning duch kelayotgan asosiy muammolarini raqamlar orqali yoritib berdi. Tadbirda 100 nafardan ortiq startap asoschilari, investorlar, davlat tashkilotlari, korporatsiyalar va ekotizim hamkorlari ishtirok etdi.
Taqdimotni Stanbase asoschisi Umed Rahimov ochib berib, tadqiqotning maqsadi va uning mustaqil metodologiyasi haqida so‘z yuritdi. Shundan so‘ng tadqiqotchi Maftuna Berkimbaeva Uzbekistan Founder Portrait 2026 hisobotining asosiy natijalarini taqdim etdi.
Tadqiqot O‘zbekistonning turli hududlaridagi startap asoschilari ishtirokida o‘tkazilgan 229 ta so‘rovnoma va 25 ta chuqur intervyu asosida tayyorlangan.
Hisobotga ko‘ra:
- 47% startap asoschilari 24 yoshdan kichik;
- 56% startapni hamasoschisiz (co-founder’siz) rivojlantirmoqda;
- 63% esa biznes o‘sishidagi eng katta to‘siq sifatida moliyalashtirishga kirish imkoniyatining cheklanganini qayd etgan.
Mazkur natijalar O‘zbekistonda yosh tadbirkorlar soni ortib borayotganini ko‘rsatsa-da, kapitalga kirish imkoniyati hanuz ekotizimning eng dolzarb muammolaridan biri bo‘lib qolayotganini tasdiqlaydi.
Tadbirning maxsus mehmoni sifatida taniqli texnologik tadbirkor David Yang ishtirok etdi. U sun’iy intellekt asosidagi avtomatlashtirish (AI Automation), raqamli xodimlar (Digital Employees) va Silikon vodiysidagi eng so‘nggi texnologik tendensiyalar haqida ma’ruza qildi.
Ekotizimning buguni va ertasi muhokama qilindi
Taqdimot yakunida UzVC, AloqaVentures, Delever va Osnova vakillari ishtirokida panel muhokamasi bo‘lib o‘tdi. Panel davomida tadqiqot natijalari, O‘zbekiston startap ekotizimining bugungi holati, investitsiya muhiti hamda texnologik kompaniyalar rivojlanishi uchun zarur bo‘lgan keyingi qadamlar yuzasidan fikr almashildi. Muhokamani Farrux Maksumov moderator sifatida olib bordi.
Uzbekistan Founder Portrait Stanbase tomonidan har yili tayyorlanadigan tadqiqot bo‘lib, uning maqsadi O‘zbekiston startap ekotizimining rivojlanishini xolis ma’lumotlar asosida tahlil qilish, asoschilar duch kelayotgan muammolarni aniqlash hamda bozorning asosiy tendensiyalarini yoritishdan iborat.
Tadqiqot Founders Hub, UNDP Uzbekistan, IT Park Uzbekistan, University of Business and Science (UBS), International School of Finance, Technology and Science (ISFT) hamda Red Team Accelerator hamkorligida amalga oshirildi.
Hisobotning to‘liq taqdimoti Stanbase tomonidan ochiq e’lon qilingan bo‘lib, unda O‘zbekiston startap ekotizimining bugungi holati va kelajakdagi rivojlanish istiqbollari bo‘yicha batafsil tahlillar keltirilgan.
