O‘zbekistonning eng yirik venchur studiyasi hisoblangan Startup Garage yaqindagina nufuzli CEVF 2026 forumida «Eng yaxshi ekotizim ishtirokchisi» (The Best Ecosystem Player) nominatsiyasida g‘olib deb topildi. Ushbu yuksak e’tirof tasodifiy emas — u kompaniyaning so’nggi yillardagi dadil strategik qadamlari, xususan, O’zbekiston loyihalarini Yaqin Sharq va Shimoliy Afrika (MENA) bozorlariga olib chiqish borasidagi tinimsiz harakatlarining mantiqiy natijasidir.
O’tgan davr mobaynida O‘zbekiston startap va venchur ekotizimining yetakchi ishtirokchilari — Startup Garage, Imkon Ventures, Asaxiy Invest va REVO GLOBAL delegatsiyasi Afrikaning eng yirik texnologiya va innovatsiya maydoni bo‘lgan Marokashdagi GITEX Africa ko’rgazmasida ishtirok etgan edi.
Bu tashrif shunchaki tanishuv emas, balki O‘zbekiston startaplari va tadbirkorlari uchun Afrika hamda MENA bozorlariga chiqish bo‘yicha amaliy ko‘prik yaratishga xizmat qildi. Kengayish doirasida Startup Garage Kasablanka (Marokash) shahrida o’zining yangi ofisini ochib, Shimoliy Afrikada o‘z faoliyatini boshlagan Markaziy Osiyodagi birinchi venchur studiyaga aylandi.
Startup Garage Morocco mintaqaviy rahbari Zaid Benbya ikki mintaqa o’rtasidagi bu kabi integratsiyani ulkan imkoniyat deb hisoblaydi:
«Biz Marokashda Startup Garage faoliyatini yo‘lga qo‘yganimizdan beri bir narsani aniq ko‘rdik: Markaziy Osiyo va Afrika o‘rtasida hali to‘liq ochilmagan, lekin juda katta salohiyatga ega bo‘lgan tabiiy hamkorlik maydoni bor. O‘zbekistonlik founderlar va tadbirkorlarning bu yerga kelib, bozorni bevosita o‘rganayotgani juda quvonarli. Bu shunchaki tashrif emas — bu uzoq muddatli hamkorliklar, investitsiyalar va real biznes aloqalarining boshlanishi.»
Afrika qit’asiga kirishdan avval Startup Garage mamlakatimizning barcha 14 hududida o’z qamrovini ta’minlab, 150 dan ortiq startaplarni qo‘llab-quvvatlashga ulgurgan edi. Ulardan 10 dan ortig‘i allaqachon $2 milliondan ziyod tashqi investitsiyalarni jalb qilishga muvaffaq bo‘lgan. REVO GLOBAL vakili Yo‘ldoshboy Sultonov uchun bu Marokashga ilk tashrif bo‘ldi. U bugungi tashabbusni O‘zbekistonlik founderlar uchun yangi bosqich deya e’tirof etdi:
«Aytishim mumkinki, bu safar biz uchun juda foydali tajriba berdi. Bozorning ichki qatlamini ko‘rish, odamlar va biznes kayfiyatini his qilish katta ahamiyatga ega. Kelajakda bu yerda hamkorliklarni kuchaytirish va biznes imkoniyatlarini chuqurroq o‘rganish niyatidamiz. Shu jihatdan, bunday tashrifni tashkil etib, bizga yangi ufqlarni ochib bergani uchun Startup Garage jamoasiga tashakkur bildiraman.»
Marokash bozoriga kirish xaritadagi tasodifiy tanlov emasligini real raqamlar ham tasdiqlaydi: 2025-yilda Kasablankada ilk ofis ishga tushirilishi bilanoq, qisqa vaqt ichida 200 dan ziyod mahalliy startapchilar ushbu platforma atrofida jipslashdi. Kompaniyaning keyingi strategik rejalari yanada yirikroq — operatsion faoliyatni kengaytirib, 100 ta doimiy rezident-kompaniyalardan iborat yirik ekotizimni shakllantirish. Ushbu zamonaviy infratuzilma nafaqat mahalliy loyihalar, balki uzoq Markaziy Osiyodan kelayotgan founderlar uchun ham Yaqin Sharq va Afrika (MENA) bozorlarini zabt etishda yagona tayanch markaz vazifasini o’taydi.
Amalga oshirilayotgan bu ishlar orqasida chuqur o’ylangan strategiya yotibdi. Bu jarayonlarni xulosalar ekan, Startup Garage asoschisi Muhammad Xalil o’z oldilariga qo’yilgan asosiy vazifaga alohida to’xtalib o’tdi:
«Bizning maqsadimiz faqat delegatsiya olib kelish emas. O‘zbek startaplari butun dunyo uchun zarur bo‘lgan texnologik yechimlarni ishlab chiqmoqda. Biz O‘zbekiston startaplari uchun global bozorni uzoqdagi orzu emas, qo‘l yetadigan imkoniyatga aylantiradigan — bozor, sherik, investor va operatsion tayanch vazifasini bajaruvchi platforma quryapmiz.»
Startup Garage haqida
Startup Garage — founder’lar, startap jamoalar va innovatsion loyihalarni qo‘llab-quvvatlovchi platforma. U ta’lim, mentorlik, akseleratsiya, investor aloqalari va bozorga chiqish imkoniyatlari orqali ekotizimni rivojlantirishga xizmat qiladi. Asosiy maqsad — O‘zbekiston va xalqaro bozorlarda founder’lar uchun real imkoniyatlar yaratish, ularni kapital va strategik hamkorliklar bilan bog‘lashdir.
