Pivot.uz ochiq manbalari asosida tayyorlangan hisobotga ko‘ra, 2026-yilning birinchi choragi (yanvar, fevral, mart) davomida O‘zbekiston venchur bozorida mahalliy va global venchur fondlar 19 ta startapga jami $146 million investitsiya kiritdi. 19 ta bitimdan 16 tasi mahalliy startaplarga, 3 tasi esa xorij bozoriga kirgan startaplarga to’g’ri keladi.
Jami $146 million investitsiyaning $131,5 millioni bevosita Uzum hissasiga to‘g‘ri keldi. Bu yilning eng yirik bitimi bo‘lib, unda xalqaro investorlar — VR Capital, Tencent va FinSight — O‘zbekistonning eng yirik e-commerce platformasiga Series A raundida investitsiya kiritishdi.
Aloqa Ventures 5 ta startapga — jami $320,000 investitsiya kiritdi. Imkon Ventures chorak davomida 6 ta startapga — Darstop, Asaxiy Invest, Karmon AI, Orif AI, Haysam School va Rentzor loyihalariga jami $205,000 investitsiya kiritdi. Bu ko’rsatkich har bir bitim uchun o‘rtacha $34,000 atrofida to‘g‘ri keladi.
IT Park Ventures va United Ventures hamkorlikda OX Group loyihasiga $900 000, Smartcast startapiga esa $200 000 investitsiya kiritdi. Bu ekotizim uchun ijobiy ko‘rsatkich. Co-investment (birgalikdagi investitsiya) amaliyoti rivojlangan bozorlarda keng tarqalgan bo‘lib, fondlarning o‘zaro raqobat emas, balki hamkorlik yo‘lini tanlaganidan dalolat beradi. Bunday yondashuv startaplarning yanada ishonchli va barqaror qo‘llab-quvvatlanishini ta’minlaydi.
Bu chorakda birinchi marta O’zbekiston ekotizimida SportTech sektori oshkor bitimda paydo bo’ldi. Angel investorlar Deepen startapiga $300 ming investitsiya kiritdi.
Bosqichlar bo’yicha taqsimotga qarasangiz, bir narsa darhol ko’zga tashlanadi: startaplar ko’p tug’ilmoqda, lekin o’sib yetishish qiyin. Pre-Seed bosqichida 7 ta bitim bor — eng ko’p. Lekin ularga ketgan pul jami $355 ming — eng kam. Series A ga yetib kelgan atigi 2 ta startap — va ularning yig’indisi $143 million (Uzum tufayli).
O‘zbekistonda startap boshlash va ilk investitsiyani jalb qilish bosqichi sezilarli darajada osonlashdi. Biroq, loyihalarni kichik bosqichdan o‘rta va yirik miqyosga o‘tkazish mexanizmi hali yetarli darajada shakllanmagan. Startaplarning «ulug‘ayish» jarayonini tizimli yo‘lga qo‘yish ekotizimning kelgusi yillardagi bosh strategik vazifasi bo’ladi.
Barcha ma’lumotlar oshkor manbalar asosida to’plangan. Birinchi chorak (Q1) uchun to‘liq hisobotni havola orqali yuklab oling
