Prezident Shavkat Mirziyoyevning tadbirkorlar bilan VI ochiq muloqotida biznes muhitini yanada yaxshilash, tadbirkorlar uchun moliyaviy imkoniyatlarni kengaytirish va davlat xizmatlarini soddalashtirishga qaratilgan qator yangi tashabbuslar ma’lum qilindi.
So‘nggi besh yilda biznesga ajratilgan kreditlar portfeli qariyb uch barobar oshib, 450 trillion so‘mga yetgan. Shu davrda tadbirkorlar 650 trillion so‘mlik soliq va bojxona imtiyozlaridan foydalangan.
Yangi tadbirkorlarni qo‘llab-quvvatlash uchun “Biznes start”, ishlab chiqarishni yo‘lga qo‘ygan korxonalar uchun “Biznes lift”, o‘sish bosqichiga o‘tayotgan bizneslar uchun esa “Biznes yuksalish” dasturlari joriy etiladi.
Davlat aktivlarini sotib olishda ham tadbirkorlar uchun shartlar yengillashtiriladi. Xususan, dastlabki to‘lov miqdori 30 foizdan 15 foizga tushiriladi. Aktiv qiymatini olti oy ichida to‘liq to‘lagan tadbirkorlarga esa 25 foizlik chegirma beriladi.
ASKUE va ASKUG tizimlariga ulangan hamda to‘lov intizomiga rioya qilayotgan korxonalar uchun avans to‘lovi 15 foiz etib belgilanadi.
Tadbirkorlarning tashqi bozorlarga chiqishini osonlashtirish maqsadida “Eksport navigator” tizimi ishga tushiriladi. U eksportning barcha bosqichlarida tadbirkorlarga kompleks xizmat ko‘rsatishga qaratiladi.
Prezident iqtisodiyotni “soya”dan chiqarish masalasida ham yangi yondashuv zarurligini ta’kidladi. Bunda tadbirkorni faqat tekshirish emas, balki unga qonuniy va to‘g‘ri ishlash yo‘lini ko‘rsatish muhimligi qayd etildi.
Kichik biznesda inson sog‘lig‘i yoki boshqa tadbirkorlar manfaatlariga zarar yetkazish bilan bog‘liq bo‘lmagan tekshiruvlarga uch yil muddatga moratoriy joriy etiladi. Bundan tashqari, barcha turdagi jarimalar miqdorini o‘rtacha ikki barobar kamaytirish rejalashtirilmoqda.
Kelasi yildan tadbirkor va davlat o‘rtasidagi nizolarda “Tadbirkorning haqlilik prezumpsiyasi” tamoyili joriy etiladi. Ya’ni, tadbirkorning huquq va manfaatlarini himoya qilishga ustuvor ahamiyat beriladi. Tadbirkorlikka oid davlat xizmatlarining 50 foizi “sukut – rozilik” tamoyiliga o‘tkaziladi.
Yaqin vaqt ichida 30 dan ortiq faoliyat turi bo‘yicha litsenziya va ruxsatnomalar bekor qilinadi. Yana 35 ta ruxsatnomani olish muddati 2–3 barobarga qisqartiriladi. 10 ta faoliyat turi esa ruxsat berish tartibidan xabardor qilish tartibiga o‘tkaziladi.
Yangi chora-tadbirlar biznes yuritishdagi ma’muriy to‘siqlarni kamaytirish, tadbirkorlarning moliyaviy imkoniyatlarini kengaytirish va xususiy sektorning iqtisodiy o‘sishdagi rolini kuchaytirishga qaratilgan.
Prezident ta’kidlaganidek, aholi farovonligini yanada oshirish uchun mamlakatda yuqori iqtisodiy o‘sish sur’atlarini saqlab qolish muhim.
