Qirg‘iziston investitsiya muhitini yanada qulaylashtirish maqsadida investorlar uchun yagona raqamli platformani ishga tushirishni rejalashtirmoqda. Yangi tizim investitsiya loyihalarini boshqarish, davlat organlari bilan muloqot qilish va zarur ruxsatnomalarni olish jarayonlarini bir joyga jamlaydi.
Platforma xorijiy va mahalliy investorlarga loyiha tanlashdan tortib uni amalga oshirishgacha bo‘lgan bosqichlarni onlayn kuzatish imkonini beradi. Hukumat bu orqali byurokratik to‘siqlarni kamaytirish, jarayonlarni shaffoflashtirish hamda investitsiya qarorlarini tezlashtirishni maqsad qilgan.
Mazkur tashabbus Qirg‘izistonning so‘nggi yillarda amalga oshirayotgan keng ko‘lamli raqamli islohotlarining davomi hisoblanadi. Mamlakat yangi Digital Code (Raqamli kodeks) asosida davlat xizmatlarini raqamlashtirish, venchur kapitalni jalb qilish va startap ekotizimini rivojlantirishga alohida e’tibor qaratmoqda.
Markaziy Osiyoda investitsiyalar uchun raqobat tobora kuchayib borayotgan bir paytda bunday platformalar investorlar uchun muhim ustunlikka aylanishi mumkin. Avvalroq Qozog‘iston ham investitsiya jarayonlarini soddalashtirish maqsadida Milliy raqamli investitsiya platformasini ishga tushirgan edi.
Qirg‘izistonning yangi platformasi muvaffaqiyatli ishga tushirilsa, u nafaqat investitsiyalar oqimini oshirish, balki davlat va biznes o‘rtasidagi hamkorlikni tezlashtirishga ham xizmat qilishi kutilmoqda. Bu tajriba O‘zbekiston va mintaqaning boshqa davlatlari uchun ham investitsiyalarni raqamlashtirish bo‘yicha muhim namuna bo‘lishi mumkin.
