Qozog‘iston xorijiy investorlarni mamlakatga jalb qilishga qaratilgan Investment Tax Residency Programme dasturini kengaytirdi. Endilikda dastur doirasida yangi investitsiya vositalaridan foydalanish imkoniyati paydo bo‘ldi.
Dastur orqali xorijiy fuqarolar ma’lum miqdorda investitsiya kiritish evaziga uzoq muddatli investor vizasi va Qozog‘iston soliq rezidentligini olishlari mumkin.
Ilgari dastur doirasida AIFC’da ro‘yxatdan o‘tgan kompaniyalar ulushlari, fondlar, aksiyalar va Astana International Exchange’da (AIX) ro‘yxatga olingan qimmatli qog‘ozlarga investitsiya qilish mumkin edi. Ushbu vositalar bo‘yicha minimal investitsiya talabi $60 ming etib belgilangan.
Yangi tartibga ko‘ra, dasturga yana bir investitsiya vositasi qo‘shildi. Ushbu yo‘nalish bo‘yicha minimal investitsiya miqdori $150 ming bo‘lib, belgilangan summa dasturda ishtirok etish davrida saqlanishi kerak.
Dastur 18 yoshdan katta, Qozog‘iston fuqarosi bo‘lmagan va so‘nggi 20 yil davomida mamlakat soliq rezidenti bo‘lmagan xorijiy fuqarolar uchun ochiq.
AIFC ma’lumotlariga ko‘ra, dasturga kiritilgan o‘zgarish Qozog‘istonning xalqaro kapitalni jalb qilish va mamlakatni investorlar uchun yanada jozibador moliyaviy markazga aylantirish strategiyasining bir qismidir. Yangi qoidalar rasmiy dastur reglamenti e’lon qilingan kundan kuchga kirgan.
Qozog‘iston shu orqali xorijiy investorlar uchun nafaqat investitsiya qilish, balki mamlakatda uzoq muddatli moliyaviy va soliq maqomiga ega bo‘lish imkoniyatlarini ham kengaytirmoqda.
