13-avgust kuni Toshkent shahrida Startup Garage akseleratsiya dasturining ikkinchi mavsumi doirasida yakuniy Grand Demo Day tadbiri bo‘lib o‘tdi. Ikki oy davom etgan intensiv dastur natijasida saralangan 14 ta eng kuchli startap loyihasi o‘z biznes g‘oyalarini venchur fondlari va angel investorlariga taqdim etishdi.
Tadbir natijalariga ko‘ra, investorlar tomonidan eng yuqori salohiyatga ega deb topilgan 3 ta loyihalarga jami $120 000 miqdorida soft commitment mablag‘lari yo‘naltirildi.
Gnezdo — Mintaqaviy ijara bozorini raqamlashtirish
Tadbirning eng yirik investitsiya paketlaridan birini Gnezdo loyihasi qo‘lga kiritdi. Ushbu startap Markaziy Osiyo bozori uchun qisqa muddatli turar-joy ijarasini to‘liq boshqarish tizimini (property management) taklif etadi. Loyiha AI yordamida narxlarni dinamik shakllantirish, 56 ta yirik OTA platformalari bilan integratsiya va mehmonlar bilan avtomatik muloqot qilish imkoniyatlarini yaratgan.
Gnezdo jamoasi o‘z faoliyatini kengaytirish uchun IT Park, United VC, Yoshlar VC, Aloqa VC hamda UC Venture fondlaridan jami $50 000 soft commitment jalb qildi. Loyihaning maqsadi — Markaziy Osiyodagi bo‘sh turgan xonadonlarni egalarining bevosita ishtirokisiz daromad keltiruvchi aktivga aylantirishdir.
BAI Soft — Biznes jarayonlarini avtomatlashtirishning kompleks yechimi
BAI Soft (Ultimate Automation Solutions) loyihasi chakana savdo va xizmat ko‘rsatish sohalarini raqamlashtirishga qaratilgan ekotizimini namoyish etdi. Kompaniya JetPOS, JetBot va JetMobile kabi mahsulotlari orqali bizneslarga real vaqt rejimida rentabellikni kuzatish va rutin vazifalarni avtomatlashtirish imkonini beradi. Hozirgi kunda kompaniyaning 4 000 dan ortiq mahsulot sotuvlari mavjud bo‘lib, CSAT (mijozlar mamnuniyati) ko‘rsatkichi 95% ni tashkil etadi.
Investorlar loyihaning o‘sish ko‘rsatkichlarini inobatga olgan holda quyidagi miqdorlarda soft commitment kiritdilar:
* UC Venture — $40 000;
* Hayot VC — $10 000.
Jami $50 000 miqdoridagi ushbu mablag‘lar BAI Soft platformasini yanada takomillashtirish va mijozlar bazasini kengaytirishga yo‘naltiriladi.
Uagro — Agrotex texnologiyalari sohasidagi yangi bosqich
Qishloq xo‘jaligi sohasida texnologik yechimlarni taklif etuvchi Uagro loyihasi ham investorlar e’tiborida bo‘ldi. Loyihaning biznes-modeli va bozor salohiyati yuqori baholanib, Aloqa Ventures venchur fondi tomonidan loyihaga $20 000 miqdorida soft commitment ajratildi.
Ushbu Demo Day O‘zbekistonning texnologik ekotizimini rivojlantirishda muhim platforma bo‘lib xizmat qildi. Tadbir Asaxiy.uz, Bellissimo, Pivot.uz kabi yirik brendlar hamkorligida tashkil etilib, yosh tadbirkorlar uchun sarmoyadorlar bilan to‘g‘ridan-to‘g‘ri hamkorlik qilish va o‘z loyihalarini xalqaro bozorga olib chiqish uchun imkoniyat yaratdi.
