O‘zbekistonning Tourism Entertainment Group (TEG) kompaniyasi AQSh fond bozorida savdo qilishni boshladi. Hilton Tashkent City mehmonxonasi, Wyndham Bukhara va Central Asian Expocenter (CAEx) majmuasiga egalik qiluvchi kompaniya AQSh bozorida aksiyalari savdo qilinadigan ilk o‘zbekistonlik biznesga aylandi.
2026-yil 14-oktabrda e’lon qilingan ma’lumotlarga ko‘ra, TEG AQShning StageWise Strategies Corp. kompaniyasi bilan biznes birlashuvini yakunladi. Birlashgan kompaniya TEG Overseas, Inc. nomi ostida faoliyat yuritadi va uning oddiy aksiyalari AQShdagi OTC Markets savdo maydonchasida sotiladi. Bitim an’anaviy IPO — aksiyalarni birlamchi ommaviy joylashtirish orqali emas, balki kompaniyalar birlashuvi orqali amalga oshirildi. Kompaniya 2025-yilda quyidagi natijalarni qayd etgan:
- $42,9 mln — jami tushum, 2024-yilga nisbatan 22% ko‘p;
- $14,4 mln — sof foyda, bir yil ichida 215% o‘sish.
TEG portfeliga Toshkentdagi Hilton Tashkent City mehmonxonasi, Buxorodagi Wyndham Bukhara mehmonxonasi va ko‘rgazma hamda biznes tadbirlari o‘tkaziladigan CAEx majmuasi kiradi. Kompaniya AKFA Group tarkibiga kiradi.
AQSh bozoriga chiqish kompaniyaga nima beradi?
TEG xalqaro kapital bozorlaridagi imkoniyatlardan foydalanib, yangi mehmonxonalar va turizm infratuzilmasi obyektlarini sotib olish, shuningdek, ko‘rgazma va konferensiyalar yo‘nalishidagi biznesini kengaytirishni rejalashtirmoqda.
AQSh bozorida aksiyalarning savdoga chiqarilishi kompaniyaga xalqaro investorlar e’tiborini jalb qilish va kelajakdagi loyihalar uchun mablag‘ topish imkonini berishi mumkin. Biroq bu jarayonning o‘zi kompaniya yangi investitsiyalar jalb qilganini anglatmaydi.
Shuningdek, OTC Markets savdo maydonchasida aksiyalar savdosi NYSE yoki Nasdaq kabi yirik AQSh fond birjalarida ro‘yxatdan o‘tish bilan bir xil emas.
O‘zbekiston turizmi uchun bu nimani anglatadi?
TEGning AQSh bozoriga chiqishi O‘zbekistonning turizm va mehmonxona biznesiga xalqaro investorlar e’tiborini oshirishi mumkin. Kompaniya mehmonxonalar, biznes turizmi va yirik tadbirlar infratuzilmasini rivojlantirish orqali O‘zbekiston va mintaqadagi faoliyatini kengaytirishni ko‘zlamoqda.
