TON asosida blokcheyn infratuzilmasi va ilovalarini ishlab chiqishga ixtisoslashgan The Open Platform (TOP) kompaniyasi A seriyali investitsiya bosqichida 28,5 million dollar mablag‘ jalb qilganini e’lon qildi. Kompaniyaning umumiy bahosi 1 milliard dollarga yetdi, bu esa TOP’ni Telegram ekotizimidagi ilk Web3-unikorn maqomiga olib chiqdi.
Investitsiya raundiga Ribbit Capital boshchilik qildi, shuningdek, Pantera Capital kabi yetakchi kriptofondlar ham ishtirok etdi. Kompaniya tashkil etilganidan beri umumiy hisobda 70 million dollar investitsiya olgan. Aytish joizki, bu safargi moliyalashtirish faqat aksiyalar orqali amalga oshirildi — tokenlar chiqarilmadi. Bu esa investorlarning kompaniya strategiyasiga yuqori ishonchini ko‘rsatadi.
TOP bevosita Telegram bilan bog‘langan bo‘lib, 900 milliondan ortiq faol foydalanuvchiga ega messenjer uchun rasmiy Telegram Wallet’ni ishlab chiqadi va TON asosidagi Web3-funktsiyalarni qo‘llab-quvvatlaydi. Ular orasida o‘yinlar, sun’iy intellekt va moliya sohalaridagi dApp ilovalari, hamda Telegram ichida to‘liq ishlaydigan kripto tranzaksiya infratuzilmasi mavjud.
TOP faoliyati yo‘nalishlari quyidagilardan iborat:
- Telegram orqali Toncoin va Bitcoin sotib olish, saqlash va ayirboshlash imkoniyatlari, P2P to‘lovlar va dApp-lar bilan integratsiya;
- Notcoin va Hamster Kombat kabi millionlab foydalanuvchilarga ega mini-ilovalarni ishga tushirish;
- Telegram eng mashhur bo‘lgan Osiyo, Afrika va Yevropa bozorlariga urg‘u berish;
- TON asosida ishlovchi o‘yin ilovalari va Play-to-Earn (P2E) mexanizmlarini rivojlantirish;
- Telegram va TON Foundation bilan strategik hamkorlik, Ribbit hamda Pantera’dan qo‘llab-quvvatlash.
Jalb qilingan sarmoyalar yordamida Telegram uchun Web3-loyihalarni kengaytirish, yangi xizmatlarni ishga tushirish va global miqyosda faoliyatni kengaytirish rejalashtirilgan. Tahlilchilarga ko‘ra, agar ekotizim jadal rivojlansa, 2025 yil oxiriga kelib Toncoin narxi 10–12 dollarga yetishi mumkin.
