2024-yil yakunlariga ko‘ra, UZCARD to‘lov tizimi 955,7 milliard so‘m (taxminan 74 million AQSH dollari) miqdorida sof foyda qayd etdi. Bu ko‘rsatkich 2023-yilga nisbatan qariyb 63 foizga yuqori. Eslatib o‘tamiz, ilgari HUMO to‘lov tizimi yil davomida 168,3 milliard so‘mlik (qariyb 13 million dollar) sof foyda ko‘rganini ma’lum qilgan edi.
“Yagona Umumrespublika Protsessing Markazi” AJ tomonidan e’lon qilingan auditdan o‘tgan moliyaviy hisobotga ko‘ra, kompaniyaning 2024-yildagi daromadi 1,3 trillion so‘mga teng bo‘ldi. Sof foyda esa bir yil avvalgi ko‘rsatkichga nisbatan 368,9 milliard so‘mga yoki 62,9 foizga oshgan.
Ma’lumotlarga qaraganda, 2024-yil yakunlariga ko‘ra, UZCARDdan ko‘proq foyda ko‘rgan banklar faqat to‘rtta bo‘lgan: O‘zmilliybank, Hamkorbank, O‘zsanoatqurilishbank va Kapitalbank.
UZCARD kompaniyasining jami aktivlari yil davomida 199,4 milliard so‘mga yoki 37 foizga oshib, 736,2 milliard so‘mga yetgan. Ustav kapitali esa 590,6 milliard so‘mni tashkil qilgan. Shu bilan birga, majburiyatlar miqdori ikki barobarga oshgan va 145,7 milliard so‘mga yetgan.
Mazkur ko‘rsatkichlar “Ernst and Young” xalqaro audit kompaniyasining xulosasi asosida shakllantirilgan.
2024-yil 31-dekabr holatiga ko‘ra, UZCARD’ning aksiyadorlik tarkibi quyidagicha:
- “IMC Capital” MChJ – 75%
- Kamron Anvarovich Akbarov – 25%
Ta’sischilik zanjiriga ko‘ra, “IMC Capital”ning yagona egasi — Berill Holding Company Limited bo‘lib, ushbu kompaniya esa Emerald Global Foundationga tegishli. Shunday qilib, UZCARD’ga Emerald Global Foundation va Kamron Akbarov hamkorlikda egalik qilmoqda.
Avvalroq, UZCARD 2024-yilning to‘qqiz oyida 660 milliard so‘mdan ortiq sof foyda olgan edi.
E’tiborga molik jihat shundaki, HUMO tizimining ham 2024-yilda sof foydasi 168,3 milliard so‘mga yetib, o‘tgan yilga nisbatan 54 milliard so‘mga yoki 47 foizga ko‘paygan.
Fikr bildirish