Loyihalar poytaxtning yetti tumanida elektr va issiqlik ta’minotini yaxshilashga qaratilgan. Yangi majmualarning umumiy elektr ishlab chiqarish quvvati 203 MVt, issiqlik quvvati esa 182 Gkalni tashkil etadi. Ular Uchtepa, Shayxontohur, Yunusobod, Mirzo Ulug‘bek, Yashnobod, Mirobod va Sergeli tumanlarida joylashtiriladi.
Loyihalar natijasida 549 ta ko‘p qavatli uy va 66 ta ijtimoiy obyekt elektr hamda issiqlik energiyasi bilan ta’minlanishi kutilmoqda. Shuningdek, 66 km elektr tarmoqlari, 141 km issiqlik tarmoqlari va 613 ta individual issiqlik punkti quriladi.
Majmualar yiliga 1,6 mlrd kVt·soat elektr va 1,4 mln Gkal issiqlik energiyasi ishlab chiqarishi mumkin. Shu bilan birga, yiliga 107 mln kub metr gaz va 4,4 mln tonna suv tejalishi kutilmoqda. Tejaladigan resurslarning umumiy qiymati qariyb 220 mlrd so‘m deb baholangan.
Loyihani Tashgen kompaniyasi moliyalashtiradi. Investitsiya kelishuvi iyul oyida imzolangan, uskunalarni yetkazib berish sentyabr oyida boshlanishi rejalashtirilgan. Yashnobod va Yangihayotdagi obyektlarni dekabr oyida, qolgan majmualarni esa 2027-yil yozida ishga tushirish ko‘zda tutilgan.
Bu loyihalar Toshkentdagi energiya infratuzilmasini modernizatsiya qilish va elektr hamda issiqlik ishlab chiqarishni bir tizimda samaraliroq tashkil etishga qaratilgan. Kogeneratsiya texnologiyasi bir vaqtning o‘zida elektr va issiqlik ishlab chiqarishi sababli mavjud resurslardan samaraliroq foydalanish imkonini beradi.
