Zypl.ai, AloqaVentures va UzVC portfel startapi, Pre-Series A investitsiya bosqichida 3 million dollar mablag‘ jalb qilganini e’lon qildi. Ushbu investitsiya raundidan so‘ng startapning bahosi 35 million dollar etib belgilandi. Startap bosh direktori Azizjon Azimiy bu yangilikni o‘zining Instagram sahifasida e’lon qildi.
Azimiy ushbu muvaffaqiyatdan hayajonlanganini bildirib, quyidagicha fikr bildirdi:
“Bizning yo‘limiz butun mintaqa uchun pretsedent yaratdi – va biz faqatgina tezlikni oshirmoqdamiz. Sun’iy intellektning sintetik modellariga asoslangan texnologiyalar – hozirgi va kelajakning AI yechimlaridir!”
Ushbu investitsiya raundining asosiy investori Gollandiyaning Prosus Ventures venchur fondi bo‘ldi. Fond 2,5 million dollar mablag‘ ajratib, Zypl.ai’ning eng yirik investori sifatida ishtirok etdi. Prosus Ventures o‘z portfelida 7 ta muvaffaqiyatli chiqish (exit) va 10 ta unicorn kompaniyani jamlagan bo‘lib, Wolt va CodeAcademy kabi yirik startaplarga sarmoya kiritgan. Hozirda 117 ta loyihaga sarmoya kiritgan ushbu fond odatda Series A va undan keyingi bosqichlardagi startaplarni qo‘llab-quvvatlaydi.
Qolgan 500 ming dollar investitsiya Qozog‘istonning Astana Hub Ventures va Singapurning Battery Road jamg‘armalari tomonidan taqdim etildi. Battery Road jamg‘armasi sobiq tadbirkor David Halpert tomonidan boshqariladi.
Bu hodisa O‘zbekistonning venchur bozorida ikki muhim ijobiy tendensiyaga ishora qilishi mumkin:
- AloqaVentures va UzVC kabi o‘zbek investorlariga chiqish (exit) imkoniyatlarining paydo bo‘lishi.
- Dunyoning yirik venchur kapital fondlarining O‘zbekiston va umuman Markaziy Osiyo mintaqasiga bo‘lgan qiziqishining ortishi.
Bu esa butun mintaqada startap ekotizimining rivojlanishiga kuchli turtki berishi mumkin.
