Qozog‘istonda e’lon qilingan «Raqamlashtirish va sun’iy intellekt yili» doirasida mintaqa texnologik ekotizimida muhim voqea yuz bermoqda. 2026-yilning 4-5-may kunlari Qozog‘istonning eng yirik shahri – Almatida ilk bor «GITEX Ai CENTRAL ASIA & CAUCASUS Kazakhstan» ko’rgazmasi bo’lib o’tadi.
Dunyodagi eng yirik texnologiya va startap tadbirlari tarmog’i hisoblangan GITEX tarmog’ining ushbu qadami Markaziy Osiyo va Kavkaz mintaqasining raqamli transformatsiyasini yangi bosqichga olib chiqishi kutilmoqda.
Tadbirning asosiy maqsadlari va tashkilotchilar
Ushbu yirik xalqaro platforma global siyosatchilar, sun’iy intellekt (SI) bo’yicha yetakchi ekspertlar, bulutli texnologiyalar rahbarlari, fintex-innovatorlar va mintaqaning eng istiqbolli startaplarini bir joyga jamlaydi. Asosiy maqsad – mintaqani raqobatbardosh raqamli markazga aylantirish.
Tadbir inD (GITEX ko’rgazmalarining global tashkilotchisi) tomonidan, Qozog‘iston Respublikasi Sun’iy intellekt va raqamli rivojlanish vazirligi, shuningdek, «Astana Hub» va Almati shahar hokimligi bilan hamkorlikda o’tkaziladi.
Almatining mezbon shahar sifatida tanlanishi tasodif emas. Shahar bugungi kunda mintaqaning innovatsiya va venchur kapitali markaziga aylanib ulgurgan:
- Startaplar o’chog’i: Almatida 1500 dan ortiq startaplar faoliyat yuritadi.
- Sarmoyalar markazi: Mamlakatdagi venchur kapitali (VC) fondlarining 50 foizi aynan shu yerda joylashgan.
- Ilmiy salohiyat: Tez orada xalqaro darajadagi Qozog‘iston Ilg’or Fan va Texnologiyalar Instituti (QAIST) ochilishi kutilmoqda.
Qozog‘iston Bosh vaziri o‘rinbosari va Sun’iy intellekt va raqamli rivojlanish vaziri Jaslan Madiyev ta’kidlaganidek:
«Biz uchun bu shunchaki keng ko’lamli tadbir emas, balki iqtisodiyot va davlat boshqaruvida raqamli transformatsiyani va sun’iy intellektni joriy etishni tezlashtirish uchun amaliy vositadir.»
Markaziy Osiyodagi eng yirik ma’lumotlar markazi (data-center) va 90% dan ortiq raqamlashtirilgan davlat xizmatlariga ega bo’lgan Qozog‘iston ushbu sohada mintaqaviy yetakchiga aylanmoqda.
GITEX ko’rgazmasining Almatida o’tkazilishi Markaziy Osiyo va Kavkazni Dubay, Abu-Dabi, Singapur, Germaniya kabi hududlarni o’z ichiga olgan dunyodagi eng yirik texnologik ekotizim bilan bevosita bog’laydi. Bu esa, o’z navbatida, yuqori texnologiyalar eksporti o’sishi, kuchli xalqaro hamkorlik va texnologik loyihalarga investitsiyalar oqimining oshishini ta’minlaydi.
