2025-yil 31-iyul kuni Figma kompaniyasi Nyu-York fond birjasida IPO o‘tkazdi va aksiyalar narxi ilk kuniyoq 229 foizga oshdi. Kompaniya asoschisi va bosh direktori Dilan Fildning ulushi shu kuni taxminan 6,6 milliard dollarga yetdi.
Ammo bu yuksak natijaning ortida yillar davomida davom etgan mehnat, qat’iyat va doimiy o‘zgarishga tayyorlik yotadi.
Thiel stipendiyasi: Figma g‘oyasining boshlanishi
Fild Brown universitetida o‘qiyotgan kezlarida, 2012-yilda o‘qishni tashlab, taniqli investor Peter Thiel tomonidan taqdim etilgan 100 ming dollarlik Thiel stipendiyasini qo‘lga kiritdi. U bu mablag‘ni kursdosh dasturchi Evan Wallace bilan bo‘lishdi. Dastlab ular dronlar uchun dastur yaratishni rejalashtirgan edi, biroq tez orada brauzerda ishlaydigan dizayn vositasiga o‘tishdi. Bu g‘oya keyinchalik Figma deb nom olgan platformaga aylandi.
Dastlabki qiyinchiliklar va muhim qaror
Dastlabki versiyalar foydalanuvchilarda katta taassurot qoldirmadi. Investorlar ham loyihaga ishonch bilan qarashmadi. Greylock’dan John Lilly Figma prototipini ko‘rib, texnik salohiyatini e’tirof etsada, tijoriy jihatdan imkoniyatini past baholadi. Kompaniya ichida esa Fieldning boshqaruv uslubi noroziliklarga sabab bo‘ldi.
Investorlar bilan ochiq suhbatdan so‘ng Fiyld tanqidni qabul qildi va o‘zgarishga qaror qildi — bu uning liderlik fazilatlaridan biri sifatida e’tirof etiladi.
Bozordagi burilish: haqiqiy Figma
2016-yilda Figma o‘zining ilk ommaviy mahsulotini taqdim etdi. Real vaqtli hamkorlik imkoniyati dizaynerlar dunyosida inqilobga sabab bo‘ldi. Microsoft, Uber va Coda kabi yirik kompaniyalar tez orada uni qabul qilishdi. Foydalanuvchilar uchun URL orqali hujjatlarni ulashish, versiyalar bilan bog‘liq muammolardan xalos bo‘lish kabi funksiyalar katta afzallik bo‘ldi.
Pandemiya davrida kuchli o‘sish
2020-yilda pandemiya bilan masofaviy ish yangi norma bo‘lgach, Figma’ning bulutga asoslangan tizimi ayni muddao bo‘ldi. Kompaniya yangi mahsuloti — FigJamni ishga tushirdi. Bu vizual hamkorlik uchun mo‘ljallangan onlayn doska bo‘lib, jamoaviy ishni yengillashtirdi.
Adobe bilan bitim va mustaqillikni saqlab qolish
2022-yilda Adobe Figma’ni 20 milliard dollarga xarid qilishni rejalashtirdi. Ammo Britaniya raqobat idoralari bitim raqobatga zarar yetkazishini bildirganidan so‘ng, 2023-yil oxirida kelishuv bekor qilindi. Adobe, bitim buzilgani uchun, Figma’ga 1 milliard dollarlik tovon puli to‘ladi.
Fild kompaniya ichida xodimlar ishonchini saqlashga harakat qildi: ularga qo‘shimcha aksiyalar berildi, ketishni istaganlarga esa uch oylik kompensatsiya taklif etildi. Atigi 5% xodim bu imkoniyatdan foydalandi.
AI asriga qadam: Figma Make
2025-yilda Figma yangi mahsulot — Figma Makeni taqdim etdi. Bu sun’iy intellekt yordamida dizaynlarni interaktiv prototiplarga aylantiradigan vosita bo‘lib, foydalanuvchilar “prompt”lar orqali to‘liq ishlaydigan ilovalarni yaratishlari mumkin.
Field bu mahsulotni shaxsan taqdim etdi, foydalanuvchi fikrlariga doimiy javob berib bordi. Hattoki IPO kuni ham u ijtimoiy tarmoqlarda foydalanuvchilarning savollariga javob yozishda davom etdi.
Figma bu — falsafa
Dylan Field boshidanoq bir tamoyilga sodiq: “Har kim ijodkor bo‘lishi mumkin”. Figma nafaqat qulay dizayn vositasi, balki dizaynerlik va jamoaviy ijod sohalariga yangicha yondashuv olib kirdi.
Bugun Field milliardlab dollarga ega bo‘lsa-da, u foydalanuvchilarning har bir fikriga e’tiborli. Figma esa startaplar olamida texnologik yondashuv, ochiqlik va foydalanuvchiga sodiqlik timsoliga aylangan.
Figma — bu dizayndan ham ko‘proq: bu kuch, madaniyat va kelajak falsafasi
Tayyorladi: Laylo Xondamirovna
