O‘zbekistonda eksportchilarning transport xarajatlarini davlat byudjetidan subsidiyalash amaliyoti bekor qilinmoqda.
O‘zbekiston prezidenti Shavkat Mirziyoyev 27-dekabr kuni eksportni qo‘llab-quvvatlash chora-tadbirlarini Jahon savdo tashkiloti bitimlariga muvofiqlashtirishga qaratilgan farmonni imzoladi.
Tuzatishlarga ko‘ra, eksportchilarning avtomobil, havo va temiryo‘l tashuvlari xarajatlarini kompensatsiya qilish amaliyoti bekor qilinmoqda.
Eksportchilarga 2024-yil 31-dekabrga qadar amalga oshirilgan eksport uchun belgilangan tartibda subsidiya va kompensatsiyalar beriladi. Ushbu to‘lovlar 2025-yil 1-fevralga qadar amalga oshiriladi.
Farmon 2025-yil 1-yanvardan kuchga kiradi.
Yangi chora-tadbirlar O‘zbekistonning JST doirasidagi xalqaro standartlari va majburiyatlariga mos keladigan eksportni qo‘llab-quvvatlashning shaffof tizimini yaratishga qaratilgan.
