Rossiyaning FESCO transport-logistika guruhi O‘zbekistonni Markaziy Osiyoda xalqaro temiryo‘l tashuvlarini kengaytirish strategiyasidagi muhim markazlardan biri sifatida baholadi. Kompaniya Xitoydan O‘zbekiston va Qozog‘istonga yangi konteyner poyezdlarini yo‘lga qo‘ydi.
Yangi FESCO Caravan Shuttle xizmati Xitoy shaharlaridan yuklarni Qozog‘iston va O‘zbekistonga Dostyk va Altynkol chegara punktlari orqali yetkazadi. Birinchi yuk — yengil sanoat mahsulotlari — Xi’an shahridan Toshkentdagi Chukursay stansiyasiga 14 kunda yetib kelgan.
FESCO vakilining so‘zlariga ko‘ra, kompaniya uchun O‘zbekistonning ahamiyati uning geografik joylashuvi, o‘sayotgan tashqi savdosi, sanoat bazasi va mintaqadagi transport-logistika markazlaridan biri ekanligi bilan bog‘liq.
FESCO’ning yangi servisiga Xitoyning g‘arbiy hududlaridagi ishlab chiqarishning tez o‘sishi ham turtki bo‘lgan. Ayniqsa, Sichuan provinsiyasidagi ishlab chiqarish klasterlari Markaziy Osiyoga katta eksport oqimini shakllantirmoqda.
Shu sababli kompaniya iyun oyida Chengdu shahrida yangi ofis ochdi. U Xitoyning g‘arbiy hududlari bilan Markaziy Osiyo o‘rtasidagi quruqlik orqali konteyner tashuvlarini rivojlantirishga xizmat qiladi. FESCO O‘zbekiston va Qozog‘istonni mintaqadagi eng istiqbolli logistika bozorlaridan deb hisoblaydi. Kompaniya O‘zbekistonda allaqachon 15 yildan ortiq faoliyat yuritib kelmoqda.
Yangi yo‘nalish O‘zbekistonning Xitoydan kelayotgan yuk oqimlaridagi rolini kuchaytirishi mumkin. Ayniqsa, Xitoyning g‘arbiy ishlab chiqarish markazlari, Markaziy Osiyo bozorlari va O‘zbekistonning ichki sanoat bazasi o‘rtasidagi aloqalar kengaymoqda.
