Google’ning Gemini AI platformasi oyiga 1 milliarddan ortiq faol foydalanuvchiga yetdi. Kompaniya bu natijani Google tarixidagi eng tez o‘sayotgan mahsulot sifatida baholamoqda.
Gemini bu ko‘rsatkichga juda tez erishdi: 2025-yil may oyida platformada oyiga 400 million faol foydalanuvchi bor edi. 2026-yil fevralida bu raqam 750 millionga, iyul oyida esa 950 millionga yetgan. Bir oy ichida yana 50 million foydalanuvchi qo‘shilib, milliardlik marradan oshildi.
Google CEO’si Sundar Pichai’ning aytishicha, Gemini endi kompaniyaning 1 milliarddan ortiq foydalanuvchiga ega bo‘lgan 14-mahsulotiga aylandi. Bu ro‘yxatda Search, Gmail, Drive, Android, YouTube va Chrome kabi Google’ning eng yirik servislar ham bor.
Gemini’ning o‘sishida Google ekotizimi muhim rol o‘ynamoqda. AI yordamchisi Android qurilmalari, Google ilovalari va boshqa servislar bilan tobora chuqurroq integratsiya qilinmoqda. Shu bilan birga, Google Gemini’ga agentik funksiyalar, jumladan Daily Brief va Gemini Spark kabi imkoniyatlarni qo‘shmoqda.
Eng qiziq jihati — Gemini bu natijaga OpenAI’ning ChatGPT’i bilan raqobat kuchaygan bir paytda erishdi. ChatGPT ham 2026-yil iyunida oyiga 1 milliard faol foydalanuvchi marrasini bosib o‘tgan. Shu tariqa, tarixda ilk bor ikkita yirik AI chatbot bir vaqtning o‘zida milliardlik auditoriyaga ega bo‘ldi.
