O‘zbekiston IT sektorida kutilgan yirik o‘zgarishlar o‘zining huquqiy tasdig‘ini topdi. IT Park tomonidan rezidentlarga yuborilgan rasmiy xabarnomaga ko‘ra, 2026-yilning 1-aprelidan boshlab texnopark rezidentlari uchun shartlar tubdan o‘zgaradi.
Yangi tartibga ko‘ra, ichki bozorga yo‘naltirilgan yirik moliyaviy xizmatlar imtiyozli zonadan chiqariladi va eksportga yo‘naltirilgan kompaniyalar uchun talablar kuchaytiriladi.
Hujjatga ko‘ra, 2026-yil 1-apreldan boshlab quyidagi toifadagi tashkilotlar uchun IT Park rezidenti maqomi va soliq imtiyozlari bekor qilinadi:
- To‘lov tashkilotlari: Click, Payme, Paynet, Oson va boshqalar;
- To‘lov tizimi operatorlari: Uzcard, Humo;
- Marketpleyslar (elektron to‘lov tizimlari): ATTO va shunga o‘xshash maxsus to‘lov platformalari;
- Mikromoliya tashkilotlari: ZoodPay, Alif (nasiya xizmatlari), Zoomrad, Moliya va boshqalar.
Shuningdek, yakka tartibdagi tadbirkorlar va o‘zini o‘zi band qilganlarga davlat va moliyaviy xizmatlar ko‘rsatuvchi raqamli platformalar ham rezidentlar safidan chiqarilishi belgilandi.
Yangi mexanizm: eksport qilmasangiz — ko‘proq to‘laysiz
IT Park shunchaki imtiyozlarni kesish bilan cheklanmay, qolgan rezidentlar uchun ham yangi moliyaviy intizomni joriy etmoqda. Endilikda direksiyaga to‘lanadigan oylik ajratmalar kompaniyaning eksport ko‘rsatkichlariga bog‘liq bo‘ladi.
2026-yil 1-apreldan boshlab rezidentlar jami daromadining kamida 20 foizini (2027-yildan esa 35 foizini) eksportdan topishlari kerak. Agar ushbu talab bajarilmasa, yirik kompaniyalar uchun IT Parkka to‘lanadigan badal miqdori oshiriladi:
| Kompaniyaning yillik daromadi | Eksport talabi bajarilganda | Eksport talabi BAJARILMAGANDA |
| 5 mlrd so‘mgacha | 1% | 1% |
| 5 mlrd – 100 mlrd so‘m | 1% | 2% |
| 100 mlrd so‘mdan yuqori | 1% | 3% |
Tahlilchilarning fikricha, 2017-yilda joriy etilgan imtiyozlar o‘z vazifasini bajarib bo‘ldi. Fintex va to‘lov tizimlari o‘tgan 8 yil ichida startap darajasidan chiqib, barqaror va yuqori daromadli biznesga aylandi. Yangi qoidalar davlatning asosiy e’tiborini ichki bozordagi xizmatlarga emas, balki valyuta tushumini ta’minlovchi IT-eksport salohiyatini oshirishga qaratayotganidan dalolat beradi.
IT Park ma’muriyati barcha rezidentlarni 1-aprelga qadar o‘z faoliyatlarini yangi qonunchilik talablariga moslashtirishga va biznes modellarini qayta ko‘rib chiqishga chaqirmoqda.
