Global Tech Weekend Tashkent 2026 xalqaro tadbiri doirasida IT Park Ventures fond kapitali $10 mln’dan $30 mln’gacha oshirilganini e’lon qildi.
Avval fond kapitali $10 mlnni tashkil etgan bo‘lib, bugungi kunga qadar uning 80% dan ortig‘i texnologik startaplar va venchur ekotizimini rivojlantirishga investitsiya qilingan. Qo‘shimcha moliyalashtirish IT Park Ventures’ga bitimlar sonini oshirish, investitsion portfelni kengaytirish hamda o‘sish bosqichidagi texnologik kompaniyalarni yanada faol qo‘llab-quvvatlash imkonini beradi.
O‘zbekiston bozorida ilk bosqichdagi startaplar bilan ishlovchi fondlar soni ortib borayotgani sababli, 2026-yildan boshlab IT Park Ventures Seed va Series A bosqichidagi startaplarga e’tiborni kuchaytirishni rejalashtirmoqda. Asosiy urg‘u yuqori o‘sish salohiyatiga ega va xalqaro bozorlarga chiqish imkoniyati mavjud bo‘lgan masshtablanuvchi texnologik loyihalarga qaratiladi.
Shuningdek, yangilangan investitsion strategiya doirasida fond $3 mln’gacha bo‘lgan investitsion cheklarni ham ko‘rib chiqish imkoniyatiga ega bo‘ladi.
Venchur ekotizimini rivojlantirish bo‘yicha davlat tashabbuslariga muvofiq, 2030-yilgacha O‘zbekistonda startap loyihalar sonini 5 000 taga, jalb qilingan venchur investitsiyalar hajmini esa $2 mlrd’gacha oshirish, shuningdek qiymati $100 mln’dan ortiq bo‘lgan 25 ta startap yaratish rejalashtirilgan.
Davlat tashabbuslari doirasida startaplarni qo‘llab-quvvatlashning to‘rt bosqichli tizimini joriy etish ham ko‘zda tutilgan bo‘lib, u g‘oya shakllanishi va mahsulot ishlab chiqishdan tortib, ishga tushirish, masshtablash va xalqaro bozorlarga chiqishgacha bo‘lgan jarayonlarni qamrab oladi.
Shuningdek, IT Park Ventures 20-mayga qadar PITCH TO INVEST: OPEN DAY dasturi uchun arizalarni qabul qilishni davom ettirmoqda. Ushbu private pitch sessions formatida Seed va Series A bosqichidagi startaplar asoschilari o‘z loyihalarini fondning investitsion jamoasiga to‘g‘ridan-to‘g‘ri taqdim etish va keyingi investitsion qo‘llab-quvvatlash imkoniyatiga ega bo‘lishlari mumkin.
