5-dekabr kuni Toshkent shahrida bo‘lib o‘tgan Central Asia Venture Conference doirasida Qazaqstan Venture Group (QVG) fondi ilk bitimini imzoladi. The Tech tahririyati ushbu voqea haqida eksklyuziv ma’lumot beradi: Qazaqstan Venture Group va UzVC birgalikda umumiy hajmi 50 million dollar bo‘lgan ikkinchi fondni shakllantirayotgan Big Sky Capital venchur fondiga sarmoya kiritdi.
Mazkur kelishuv Markaziy Osiyoda yagona venchur bozorini shakllantirish yo‘lidagi muhim qadamlardan biri bo‘ldi. Bu bitim mintaqa startaplari uchun yangi imkoniyatlar yaratib, A va B bosqichlaridagi loyihalarni qo‘llab-quvvatlashga tayyor yangi fondlar paydo bo‘lishidan darak bermoqda. Shuningdek, u xalqaro investorlar e’tiborini Markaziy Osiyoga yanada kuchliroq jalb etadi.
Qazaqstan Venture Group boshqaruvchi hamkori Askar Bilisbekovning ta’kidlashicha, ushbu bitim oddiy investitsiya emas, balki mintaqaviy venchur ekotizimni rivojlantirishdagi strategik bosqich hisoblanadi.
Askar Bilisbekov, Qazaqstan Venture Group boshqaruvchi hamkori:
“Bugun biz uchun muhim sana — Qazaqstan Venture Group fondi sifatida ilk bitimimizni amalga oshirdik. UzVC bilan birgalikda Big Sky Capital’ga sarmoya kiritmoqdamiz, bizning ulushimiz 10 million dollarni tashkil etadi. Bu kelishuv butun mintaqa uchun ahamiyatli. O‘zbekiston va Qozog‘istonni alohida-alohida ko‘rib chiqish o‘rniga, yagona Markaziy Osiyo bozorini shakllantirishimiz kerak — aynan shunday bozor global investorlar uchun jozibador bo‘ladi.”
UzVC bosh direktori Dilshod Hashimov ham ushbu bitimning muhimligini alohida ta’kidladi. Unga ko‘ra, bu UzVC’ning Markaziy Osiyoga yo‘naltirilgan ikkinchi xorijiy venchur fondga kiritgan investitsiyasi bo‘ldi.
Dilshod Hashimov, UzVC bosh direktori:
“Biz Big Sky Capital bilan kelishuvni imzoladik — bu bizning Markaziy Osiyoga fokuslangan ikkinchi xorijiy venchur fondimiz. Investitsiyamiz miqdori 2 million dollarni tashkil etadi. Bu yurtimiz yoshlari va startaplari uchun katta imkoniyatlar eshigini ochadi.”
Big Sky Capital allaqachon O‘zbekistonda ikkinchi fondini ro‘yxatdan o‘tkazish jarayonini rasman boshlagan. Fond portfelida bugungi kunda O‘zbekistondan bo‘lgan uchta startap mavjud, shuningdek, besh kompaniya mamlakatda o‘z ofislarini ochgan. Fond UzVC, Aloqa Ventures, Uzcard Ventures va SQB Ventures kabi bozorning yetakchi o‘yinchilari bilan faol haminvestitsiya hamkorligini rivojlantirmoqda.
Adil Nurg‘ojin, Big Sky Capital boshqaruvchi hamkori:
“Biz allaqachon bitimlar pipeline’ini shakllantirmoqdamiz va O‘zbekistonda jamoa yig‘yapmiz. 2026-yil juda qiziqarli bo‘ladi. Rejalarimiz katta, umidlarimiz ham shunday.”
Qazaqstan Venture Group, UzVC va Big Sky Capital o‘rtasidagi ushbu bitim Markaziy Osiyo uchun yilning eng muhim voqealaridan biri sifatida qayd etildi. Ilk bor ikki davlatning institutsional investorlari kuchlarini birlashtirib, umumiy venchur makonni yaratmoqda. Bu esa xalqaro kapital, texnologik kompaniyalar va startaplar uchun Markaziy Osiyoni yangi jalb markaziga aylantiradi.
