Samarqand shahrining kengaytirilishi doirasida yangi hududlarda sanoat zonalari, texnoparklar va yuqori texnologiyali korxonalar tashkil etilishi rejalashtirilmoqda. Shahar tarkibiga jami 17 226,5 gektar hudud qo‘shilishi kutilmoqda. Natijada Samarqand aholisi qariyb 880 ming kishiga yetadi. Asosiy maqsad — yangi hududlarni iqtisodiy faollik markazlariga aylantirish.
Rejaga ko‘ra, qo‘shiladigan hududlarda:
— yangi sanoat zonalari;
— texnoparklar;
— yuqori texnologiyali ishlab chiqarish korxonalari;
— xizmat ko‘rsatish va turizm obyektlari tashkil etiladi.
Bu orqali Samarqandda yangi ishlab chiqarish quvvatlarini yaratish, investitsiyalarni jalb qilish va ish o‘rinlarini ko‘paytirish ko‘zda tutilmoqda. Samarqand viloyatida texnologik ishlab chiqarish uchun infratuzilma allaqachon rivojlantirilmoqda. Xususan, “Technopark Nurabad” maxsus sanoat zonasida 2025–2030-yillarda $1,1 mlrd miqdorida to‘g‘ridan-to‘g‘ri xorijiy investitsiya jalb qilish va 5,1 mingta doimiy ish o‘rni yaratish rejalashtirilgan.
Shuningdek, Samarqand shahrida IT Park filialini rivojlantirish, uni yoshlar, startaplar va IT kompaniyalari uchun innovatsion markazga aylantirish bo‘yicha loyihalar ham amalga oshirilmoqda. Shu sababli Samarqandning kengayishi nafaqat hududiy o‘zgarish, balki shaharning sanoat, texnologiya va innovatsiyalar markazi sifatidagi rolini kuchaytirish uchun yangi imkoniyat yaratishi mumkin.
