2026-yil 1-avgustdan boshlab Toshkent shahrida kichik biznesni qo‘llab-quvvatlashga qaratilgan yangi mexanizm ishga tushadi. Unga ko‘ra, ishlab chiqarish va xizmat ko‘rsatish sohasida faoliyat yuritayotgan tadbirkorlarga bo‘sh turgan davlat binolari hamda yer uchastkalari ma’lum shartlar asosida bepul foydalanishga ajratiladi.
Mazkur tartib Prezidentning «Toshkent shahrini 2026–2027-yillarda ijtimoiy-iqtisodiy rivojlantirish bo‘yicha qo‘shimcha chora-tadbirlar to‘g‘risida»gi qarori bilan joriy etildi. Hujjat foydalanilmayotgan davlat mulkini tadbirkorlik faoliyatiga jalb qilish va kichik biznesni qo‘llab-quvvatlashni maqsad qilgan.
Yangi tartibga muvofiq, Toshkent shahar hokimiga Savdo-sanoat palatasi reyestriga kiritilgan hamda ishlab chiqarish yoki xizmat ko‘rsatish yo‘nalishida faoliyat yuritayotgan kichik biznes subyektlarini qo‘llab-quvvatlash bo‘yicha alohida qarorlar qabul qilish vakolati beriladi.
Shuningdek, tadbirkorlarga foydalanilmayotgan davlat bino va inshootlari 10 yilgacha bepul foydalanish uchun ajratilishi mumkin. Bunda obyektni ta’mirlash va zarur jihozlar bilan ta’minlash xarajatlari tadbirkorning o‘z mablag‘lari hisobidan amalga oshiriladi.
Bundan tashqari, maydoni 1 500 kvadrat metrgacha bo‘lgan bo‘sh yer uchastkalarida investitsiya loyihalarini amalga oshirish imkoniyati yaratiladi. Loyiha doirasida qurilgan obyekt davlatga topshirilgach, mazkur yer uchastkasi tadbirkorga 15 yilgacha bepul foydalanish uchun berilishi mumkin.
Yangi mexanizm foydalanilmayotgan davlat aktivlarini iqtisodiy aylanishga kiritish, yangi investitsiya loyihalarini rag‘batlantirish hamda Toshkent shahrida ishlab chiqarish va xizmat ko‘rsatish sohasidagi kichik biznes rivojini jadallashtirishga xizmat qilishi kutilmoqda.
