Higgsfield rasman tarixda eng tez rivojlanayotgan generativ sun’iy intellekt (GenAI) kompaniyasi maqomini qo‘lga kiritdi. Kompaniya bugun 1,3 milliard dollar bahosida 130 million dollarlik «Series A» moliyalashtirish bosqichi yakunlanganini e’lon qildi. Accel, Alpha Intelligence Capital va Menlo Ventures kabi jahon darajasidagi venchur fondlar tomonidan qo‘llab-quvvatlangan Higgsfield, an’anaviy SaaS o‘sish ko‘rsatkichlarini butunlay ortda qoldiruvchi natijalarni qayd etdi.
Higgsfield’ning yuksalish tezligi mutaxassislarni hayratga solmoqda. Atigi to‘qqiz oylik faoliyati davomida kompaniyaning yillik daromad ko‘rsatkichi (ARR) 200 million dollarga yetdi. E’tiborlisi, o‘sish sur’ati pasayish o‘rniga yanada jadallashgan: kompaniya o‘z daromadini so‘nggi sakkiz hafta ichida 100 million dollardan 200 million dollargacha, ya’ni ikki baravarga oshirishdi.
Trillion dollarlik video iqtisodiyoti nishonda
Soha tahlilchilari Higgsfield’ni dasturlash olamini o‘zgartirgan AI-muharriri «Cursor»ga qiyoslab, uni «Video olami uchun Cursor» deb atay boshladilar. Biroq kompaniya rahbariyati bu qiyoslash ularning ulkan rejalarini to‘liq aks ettirmasligini ta’kidlamoqda. Dasturlash vositalari bozori yuzlab milliard dollar bilan o‘lchansa, Higgsfield trillion dollarlik global video iqtisodiyotini o‘zgartirishni maqsad qilgan. Ushbu platforma shunchaki oddiy vosita emas, balki kelajak avlod video ishlab chiqarish sanoatining fundamental infratuzilmasi sifatida barpo etilmoqda.
Bu strategik qarash allaqachon butun dunyo bo‘ylab 15 milliondan ortiq foydalanuvchini o‘ziga jalb qildi. Muhimi shundaki, Higgsfield o‘zining yirik korporatsiyalar bilan ishlashga to‘liq tayyorligini isbotlay oldi. Platforma nafaqat individual ijodkorlar, balki yirik biznes vakillari orasida ham ommalashmoqda. Ichki ma’lumotlarga ko‘ra, yirik korporativ mijozlar platforma xizmatlari uchun yiliga 300 000 dollardan ortiq mablag‘ sarflamoqdalar.
Kompaniya jamoasining mahsuldorligi ham rekord darajada: 2025-yilning o‘zida 200 dan ortiq yangi mahsulot va funksiyalar taqdim etilgan. Bu ko‘rsatkich Higgsfield’ning o‘ta moslanuvchan va tezkor muhandislik madaniyatiga ega ekanligidan dalolat beradi.
CEO Alex Mashrabov Linkedin sahifasida kompaniya erishilgan natijalar uchun o‘z hamjamiyati va investorlariga minnatdorchilik bildirib, bu hali ulkan yo‘lning boshlanishi ekanini ta’kidladi: «Bizning maqsadimizga ishongan barcha hamkorlarimizga rahmat. Biz endigina ish boshladik.»
Pivot.uz’da Alex Mashrabov bilan bo’lgan suhbatni ko’rishingiz mumkin
