WhatsApp foydalanuvchilari endi uzoq suhbatlarni varaqlamasdan, o‘tkazib yuborilgan xabarlardan xabardor bo‘lishlari mumkin. Android uchun chiqarilgan so‘nggi beta versiyada (2.25.21.12) Quick Recap (“Tez ko‘rib chiqish”) deb nomlangan yangi funksiya sinovdan o‘tkazilmoqda. Bu funksiya sun’iy intellekt yordamida o‘qilmagan xabarlarning qisqacha mazmunini yaratadi.
WABetaInfo portali xabariga ko‘ra, foydalanuvchilar “Chatlar” yorlig‘ida beshtagacha suhbatni tanlab, ular bo‘yicha qisqacha mazmuniy sharh olishlari mumkin bo‘ladi. Bu, ayniqsa, ko‘p xabar o‘tkazib yuborilgan suhbatlarda vaqtni tejashga yordam beradi.
Quick Recap funksiyasi avtomatik tarzda yoqilmaydi — uni ishga tushirish uchun foydalanuvchi uni qo‘lda sozlamalardan yoqishi kerak bo‘ladi.
Maxfiylik ustuvorlikda
WhatsApp ushbu funksiya foydalanuvchi maxfiyligini buzmasligini alohida ta’kidlamoqda. Quick Recap Private Processing (Shaxsiy qayta ishlash) texnologiyasi asosida ishlaydi, bu esa WhatsApp hamda uning egasi bo‘lgan Meta kompaniyasiga na foydalanuvchi xabarlariga, na sun’iy intellekt yaratgan qisqacha sharhlarga kirish imkonini bermaydi. Ma’lumotlar shifrlangan holda izolyatsiyalangan muhitda qayta ishlanadi.
Shuningdek, Quick Recap Advanced Chat Privacy (Kengaytirilgan chat maxfiyligi) funksiyasi faollashtirilgan suhbatlarda ishlamaydi.
Hozircha ushbu funksiya ishlab chiqish bosqichida bo‘lib, yaqin kelajakdagi yangilanishlardan birida barcha foydalanuvchilar uchun taqdim etilishi kutilmoqda. Biroq hozirning o‘zida ham, xohlaganlar ushbu imkoniyatni sinab ko‘rishlari mumkin — buning uchun WhatsApp’ning 2.25.21.12 raqamli beta versiyasini o‘rnatish kifoya.
