Toshkent, O’zbekiston — Imkon Ventures O’zbekistondagi savdo va xizmat ko’rsatish sohasi uchun chegirma, keshbek va sodiqlik dasturlarini yagona raqamli platformada birlashtiruvchi Dcard startapiga $20 000 miqdorida pre-seed investitsiya kiritganini e’lon qildi. Mazkur investitsiya Imkon Ventures’ning iste’mol bozori va xizmat ko’rsatish sektori uchun raqamli infratuzilma yaratayotgan dastlabki bosqichdagi jamoalarni qo’llab-quvvatlash strategiyasining mantiqiy davomi hisoblanadi.
Dcard platformasi Javlon Jabbaraliyev boshchiligidagi jamoa tomonidan ishga tushirilgan. Loyihaning pilot bosqichi 2026-yil avgust oyida boshlangan bo’lib, qisqa muddat ichida 50 dan ortiq hamkor biznes bilan aloqa o’rnatilgan va platforma o’zining dastlabki daromadini qayd etgan. Kompaniya 2026-yil yakuniga qadar hamkor bizneslar sonini 500 tadan oshirishni maqsad qilgan.
O’zbekistonda savdo va xizmat ko’rsatish bozorining umumiy hajmi $25–30 milliard deb baholanmoqda, biroq chegirma va sodiqlik tizimlari bugungi kunda nihoyatda tarqoq holatda qolmoqda. Har bir soha — avtoxizmat, go’zallik salonlari, restoranlar, fitnes markazlari — o’zining alohida chegirma va bonus tizimini yuritadi. Natijada iste’molchi o’nlab turli kartalar va ilovalarni boshqarishga majbur bo’ladi, bizneslar esa mijozni qaytarish uchun tobora qimmatlashib borayotgan marketing xarajatlarini ko’taradi. Dcard ushbu tizimlarni yagona ilovada birlashtirib, muammoni ikkala tomon uchun bir vaqtda hal qilishni maqsad qilgan.
Platforma foydalanuvchilarga bitta ilova orqali barcha hamkor bizneslarning chegirma, keshbek va sodiqlik dasturlaridan foydalanish imkonini beradi. Bizneslar uchun esa alohida merchant paneli taqdim etiladi — u orqali hamkorlar chegirma shartlarini mustaqil boshqarishi, savdo ma’lumotlarini real vaqt rejimida kuzatishi va mijozlar oqimini tahlil qilishi mumkin.
Dcard ikki tomonlama daromad modeli asosida ishlaydi: hamkor bizneslardan platforma orqali amalga oshirilgan tranzaksiyalar bo’yicha 5% komissiya olinadi, foydalanuvchilar esa oyiga 70 000 so’m miqdoridagi obuna orqali kengaytirilgan imtiyozlardan foydalanadi.
Kompaniyaning bozorga chiqish strategiyasi ikki yo’nalishga asoslangan. Birinchisi — ambassador modeli: har bir soha bo’yicha mashhur blogerlar va influencerlar bilan hamkorlik qilinadi, ular platforma komissiyasidan kelishilgan xolda 30% gacha ulush oladi. Ushbu model marketing xarajatlarini bevosita natijaga bog’laydi va mijoz jalb qilish qiymatini nazorat ostida ushlab turish imkonini beradi. Ikkinchisi — har bir shaharda mahalliy biznes egalari bilan bevosita ishlash orqali hamkorlar tarmog’ini shakllantirish.
2026-yil davomida Dcard mahsulotni O’zbekistonning 3–4 ta yirik shahrida — Toshkent, Samarqand va Buxoroda — to’liq ishga tushirishni rejalashtirgan. Shu davr mobaynida kompaniya dastlabki 4–5 vertikalda (avtoxizmat, go’zallik, restoran va fitnes) 500 dan ortiq merchant hamkorligini shakllantirish hamda obunachilar bazasini 200 000 foydalanuvchiga yetkazishni maqsad qilgan.
Dcard asoschisi va bosh direktori Javlonbek Jabboraliyev hozirda Toshkent axborot texnologiyalari universitetida (TATU) Software Engineering yo’nalishi bo’yicha tahsil olmoqda. Dcard’gacha u O’zbekistonning yetakchi elektron tijorat platformasi Uzum Marketda B2B hamkorlarni jalb qilish yo’nalishida ishlagan, so’ngra marketplace’larda savdo bo’yicha o’quv markazi — Soff Academy’da operatsion direktor lavozimida faoliyat yuritgan. Ushbu tajriba unga hamkor bizneslarni jalb qilish va savdo jarayonlarini tashkil etish bo’yicha amaliy kompetensiya bergan bo’lib, aynan shu ko’nikmalar Dcard’ning merchant tarmog’ini shakllantirishda asosiy omil bo’lib xizmat qilmoqda.
«O’zbekistonda chegirma va sodiqlik dasturlari mavjud, ammo ular tarqoq — iste’molchi ulardan to’liq foydalana olmaydi, biznes esa ularning samarasini o’lchay olmayd. Biz iste’molchi uchun bitta ilova, biznes uchun esa bitta boshqaruv paneli yaratmoqdamiz. Endi bizning asosiy vazifamiz — ushbu modelni yangi shaharlar va yangi sohalarga kengaytirish.», — deydi Dcard asoschisi Javlon Jabbaraliyev.
«Dcard bizneslar va iste’molchilar bir vaqtning o’zida duch keladigan muammoni hal qilmoqda. O’zbekistonda mijozni jalb qilish va qaytarish xarajati tez o’sib bormoqda, sodiqlik infratuzilmasi esa deyarli shakllanmagan. Javlonbek va uning jamoasi pilot bosqichdayoq hamkorlar va foydalanuvchilarni qanchalik tez jalb qila olishini ko’rsatdi. Biz nafaqat dastlabki bosqichdagi jamoaga, balki butun sektor uchun standart bo’lib xizmat qilishi mumkin bo’lgan infratuzilmaga sarmoya kiritmoqdamiz», — Imkon Ventures bosh direktori Tohirjon Mirzajonov
Dcard haqida
Dcard — chegirma, keshbek va sodiqlik dasturlarini yagona mobil ilovada birlashtiradi. Platforma iste’molchilarga hamkor bizneslar tarmog’i bo’ylab imtiyozlardan foydalanish, bizneslarga esa mijozlar oqimini boshqarish va savdo ma’lumotlarini real vaqt rejimida tahlil qilish imkonini beradi. 2026-yil avgust oyida pilot loyihasini ishga tushirgan kompaniya hozirda avtoxizmat, go’zallik, restoran va fitnes yo’nalishlarida 50 dan ortiq hamkor hamda 200 dan ortiq foydalanuvchiga xizmat ko’rsatmoqda. Aloqa: dcard.hq@gmail.com
Imkon Ventures haqida
Imkon Ventures — O’zbekistonda tashkil etilgan xususiy venchur fond bo’lib, Tohirjon Mirzajonov rahbarligida fintech, B2B SaaS, sun’iy intellekt, deeptech va ta’lim texnologiyalari yo’nalishlaridagi pre-seed va seed bosqichidagi startaplarga yo’naltirilgan. UzVC Fondlar Fondi ko’magi bilan 5 million AQSh dollari miqdoridagi fondga ega Imkon Ventures kelgusi ikki yil ichida 25–30 ta startapga investitsiya kiritishni, mahalliy jamoalarni qo’llab-quvvatlashni va ularni global texnologiya ekotizimiga integratsiya qilishni rejalashtirmoqda.
