O’zbekiston Raqobat qo’mitasi TBC Bank Group tarkibiga kiruvchi kompaniyaning OLX Classifieds’ni sotib olishiga rozilik berdi va iqtisodiy konsentratsiya bitimini rasman tasdiqladi.
Qo’mita BAAdagi Tapuz Limited kompaniyasining arizasini ko’rib chiqdi. Ariza OLX savdo belgisi ostida onlayn reklama xizmatlarini ko’rsatuvchi OLX Classifieds’ning 100% ulushini sotib olishga taalluqli edi.
Tapuz Limited kompaniyasining asosiy aksiyadori — TBC Bank Group PLC — O’zbekistonda TBC Bank raqamli tijorat banki hamda Payme onlayn to’lov xizmatiga bilvosita egalik qiladi. Qo’mita, shuningdek, Payme va OLX Classifieds’ning raqamli platformalar sohasida ustun mavqega ega korxonalar ro’yxatiga kiritilganligini ham inobatga oldi.
Bundan tashqari, Tapuz Limited O’zbekistonda onlayn reklama bozorida faoliyat yurituvchi boshqa xo’jalik yurituvchilar ustav fondida hech qanday ulushga ega emasligi aniqlandi.
Rozilik shartlari
Qo’mita bitimni raqobat muhitini saqlash va iste’molchilar manfaatlarini himoya qilishga qaratilgan bir qator majburiy talablar asosida tasdiqladi:
- Bir tomonlama ta’sir ko’rsatish taqiqi: Tapuz Limited va TBC Bank Group PLC nazoratidagi raqamli platformalar orqali OLX foydalanuvchilari uchun xizmatlar shartlariga bir tomonlama va asossiz ta’sir ko’rsatish taqiqlanadi.
- Ma’lumotlarni himoya qilish: OLX orqali to’planadigan yoki qayta ishlanadigan ma’lumotlardan TBC Bank va Payme raqobatchilari mijozlariga oid shaxsiy yoki tijorat ma’lumotlarini raqobatni cheklash maqsadida foydalanish yoki oshkor qilish taqiqlanadi.
- Ustun mavqeni suiiste’mol qilmaslik: Korxonalar o’z dominant mavqeini suiiste’mol qilmasligi va iste’molchilar huquqlarini kamsitmasligi lozim.
- To’lov betarafligi: Foydalanuvchilarni OLX orqali to’lovlarni faqat Payme yoki TBC Bank ilovasi orqali amalga oshirishga majburlash taqiqlanadi; boshqa to’lov xizmatlari uchun ham teng sharoit yaratilishi shart.
Kompaniya, shuningdek, «Raqobat to’g’risida»gi qonun va tegishli normativ hujjatlar talablariga to’liq rioya qilishi majburiy.
2025-yil avgustida TBC Bank Group OLX Uzbekistan aksiyalarining 100% nazorat paketini sotib olgan edi. Sotuvchi Prosus tarkibiga kiruvchi OLX Group bo’lib, bitimni amalga oshirish uchun TBC Bank Group Titan Investments bilan qo’shma korxona tashkil etgan edi.
