IT Park Ventures Britaniyaning Ayan Capital islomiy fintech startapi uchun jalb qilingan $4 mln AQSh dollarlik ASA investitsiya raundida ishtirok etib, $1 mln AQSh dollari miqdorida investitsiya kiritdi. Raundda Buyuk Britaniya va Shveysariyadan xalqaro investorlar ham qatnashdi. Jalb qilingan mablag‘lar kompaniyani yanada kengaytirish, texnologik yechimlarni rivojlantirish hamda, ayniqsa, O‘zbekistonda joylashgan dasturchilar jamoasini kengaytirishga yo‘naltiriladi.
Ayan Capital — Markaziy Osiyodagi eng yirik fintech kompaniyalaridan biri bo‘lgan Alif’ni yaratgan seriyali tadbirkorlar Abdullo Qurbonov, Firdavs Mirzoyev va Zuhursho Rahmatulloyev tomonidan asos solingan Britaniyaning islomiy fintech startapidir.
Ayan Capital Londonda joylashgan bo‘lib, Buyuk Britaniyada islomiy moliyaviy xizmatlarning raqamli ekotizimini rivojlantirmoqda. Bugungi kunda kompaniya jismoniy shaxslar, tadbirkorlar va biznes vakillari uchun avtomobillarni to‘liq raqamli haloal moliyalashtirish xizmatlarini taqdim etadi. Bunda kompaniya o‘zining avtomatlashtirilgan skoring va anderrayting texnologiyalaridan foydalanadi. Shuningdek, Ayan Capital Ayan Pay to‘lov platformasi, debet kartalari, islomiy depozitlar va muddatli to‘lov yechimlari kabi yangi moliyaviy mahsulotlarni ham faol rivojlantirmoqda.
Ayan Capital Buyuk Britaniyaning Moliyaviy xulq-atvorni nazorat qilish boshqarmasi (FCA) litsenziyasiga ega bo‘lib, bu kompaniyaning dunyodagi eng rivojlangan moliyaviy bozorlardan biri talablariga yuqori darajada mos kelishini tasdiqlaydi.
IT Park Ventures investitsiyasi kompaniyaning texnologik ekotizimini yanada rivojlantirish, kredit skoringi va avtomobil moliyalashtirish jarayonlarini avtomatlashtirish uchun sun’iy intellektga asoslangan yechimlarni yaratish, shuningdek, O‘zbekistondagi dasturchilar jamoasini kengaytirishga yo‘naltiriladi.
Ayan Capital’ning strategik maqsadi ixtisoslashgan islomiy fintech kompaniyadan Buyuk Britaniyaning to‘laqonli raqamli neo-bankiga aylanishdir. Kompaniya allaqachon bank litsenziyasini olish va G‘arb bozoridagi eng yirik islomiy moliyaviy ekotizimlardan birini yaratish rejalari haqida ma’lum qilgan.
IT Park Ventures uchun mazkur investitsiya fintech, sun’iy intellekt va raqamli moliyaviy xizmatlar sohasida kuchli ekspertizaga ega, global salohiyatli texnologik startaplarni qo‘llab-quvvatlash strategiyasining bir qismidir. Fond xalqaro bozorlarda muvaffaqiyatli faoliyat yuritayotgan va shu bilan birga O‘zbekistonda texnologik hamda mahsulot jamoalarini rivojlantirayotgan kompaniyalarga alohida e’tibor qaratadi. Bu esa milliy innovatsion ekotizimning rivojlanishi va yuqori malakali ish o‘rinlarining yaratilishiga xizmat qiladi.
“Biz, avvalo, butun bozorlarni o‘zgartira oladigan jamoalarga investitsiya kiritamiz. Ayan Capital asoschilari Markaziy Osiyodagi eng yirik fintech kompaniyalaridan birini yaratish orqali buni allaqachon isbotlagan. Bugun ular Buyuk Britaniyada yangi avlod raqamli bankini barpo etmoqda va biz ushbu o‘sish tarixining bir qismi bo‘layotganimizdan mamnunmiz. Global biznes qurayotgan va shu bilan birga mamlakat ichida kuchli jamoalarni shakllantirayotgan startaplarni qo‘llab-quvvatlash IT Park Ventures’ning ustuvor yo‘nalishlaridan biridir. Kuchli jamoa, zamonaviy texnologiyalar va ulkan maqsadlar uyg‘unligi kompaniyaga Britaniya bozorida muhim o‘rin egallash imkonini berishiga ishonamiz”, — dedi IT Park Ventures direktori Dalerxon Nodirov.
Ayan Capital’ga kiritilgan investitsiya IT Park Ventures’ning xalqaro portfelini mustahkamlaydi va fondning global bozorlar uchun innovatsion yechimlar yaratayotgan hamda O‘zbekiston texnologik ekotizimining rivojlanishiga hissa qo‘shayotgan istiqbolli texnologik kompaniyalarni qo‘llab-quvvatlashga bo‘lgan intilishini tasdiqlaydi.
