TBC Bank Group PLC (“TBC PLC”) O‘zbekistondagi sho‘ba korxonasi — TBC Uzbekistan faoliyatini qo‘llab-quvvatlash maqsadida 3 yillik sintetik obligatsiyalar chiqarilishini ma’lum qildi. Ushbu obligatsiyalar O‘zbekiston so‘mida denominatsiyalangan bo‘lib, AQSh dollarida hisob-kitob qilinadi va 22% yillik kupon stavkasiga ega. Ular bir necha bosqichda chiqariladi: birinchi bosqichda $140 millionlik mablag‘ jalb qilinadi, qolgan $60 million esa keyingi 12–18 oy ichida chiqarilishi rejalashtirilgan.
Obligatsiyalar Vena multilateral savdo maydonchasi (MTF)da ro‘yxatdan o‘tkazilgan bo‘lib, investorlar tomonidan katta qiziqish bildirildi. Bu esa, o‘z navbatida, TBC Group strategiyasiga bo‘lgan ishonch va O‘zbekistonning investitsiya jozibadorligi ortib borayotganini yana bir bor tasdiqlaydi. Mintaqaning eng yirik aholi soniga ega bo‘lgan va tez sur’atlar bilan rivojlanayotgan mamlakat sifatida O‘zbekiston hali to‘liq ochilmagan iqtisodiy salohiyatga ega.
Jalb qilinayotgan mablag‘ TBC Uzbekistan faoliyatini yanada kengaytirish, mahsulotlar turlarini ko‘paytirish va yuqori o‘sish sur’atiga ega yangi segmentlarga — jumladan, kichik va o‘rta biznes (SME) uchun mo‘ljallangan bank xizmatlari va kreditlash yo‘nalishlariga kirib borish imkonini beradi. TBC Uzbekistan joriy yilning birinchi choragida kredit portfeli va daromadini ikki barobarga oshirishga erishdi. Endilikda kompaniya umumiy TBC Group daromadining 21 foizini tashkil etmoqda.
19,7 milliondan ortiq foydalanuvchiga ega TBC Uzbekistan ekotizimi uchta asosiy yo‘nalishda faoliyat yuritadi: TBC UZ — mamlakatdagi eng yirik raqamli bank; Payme — jismoniy shaxslar va kichik biznes uchun to‘lov ilovasi; va Payme Nasiya — jadal sur’atlar bilan o‘sayotgan bo‘lib-to‘lash asosidagi kreditlash platformasi.
TBC PLC bosh direktori Vaxtang Butskhrikidze mazkur obligatsiya chiqarilishi yuzasidan quyidagicha fikr bildirdi:
“Ushbu obligatsiya orqali jalb qilinadigan investitsiya O‘zbekistonda tez sur’atlar bilan rivojlanayotgan biznesimizga yangi sur’at baxsh etadi. Investorlarning yuqori qiziqishi nafaqat bizning rentabellikka asoslangan o‘sish strategiyamiz, balki O‘zbekistonning keng imkoniyatlarga ega bo‘lgan bozoriga ishonchini ham aks ettiradi. Biz TBC Uzbekistan ekotizimi yil yakuniga qadar barcha belgilangan maqsadlarga erishishiga to‘liq ishonamiz.”
TBC PLC’ning xalqaro bizneslar bo‘yicha rahbari Oliver Hughes esa shunday dedi:
“Biz O‘zbekistonda faoliyatimizni faol rivojlantirmoqdamiz. Bugungi kunda ro‘yxatdan o‘tgan foydalanuvchilar soni 19,7 millionga yetdi, daromad va kredit portfelimiz yil davomida ikki barobarga oshdi. Endi biz mahsulot portfelimizni kengaytirish, ayniqsa, kichik va o‘rta biznes uchun innovatsion xizmatlar yaratish orqali yetakchiligimizni mustahkamlash niyatidamiz. Yangi investitsiya bu yo‘nalishdagi harakatlarimizni tezlashtiradi.”
