To‘yga bir necha oy qolgan. Ammo hali na joy masalasi hal, na kiyimlar tanlangan, qanday taklifnoma qilish esa katta so‘roq ostida. Telegram guruhlardagi tartibsiz xabarlar, tanish-bilishlarning bir-biriga zid tavsiyalari nafaqat kelin-kuyovni, balki butun oilani charchatib qo‘yadi.
Shu yerda haqli savol tug‘iladi: Nega XXI asrda to‘y qilish shunchalik murakkablashib ketdi?
Aynan shu savol va shaxsiy izlanishlar natijasida YorYor startapi dunyoga keldi. Loyihaning bosh maqsadi — to‘y jarayonini to‘liq raqamlashtirish, uni shaffof, tartibli va eng muhimi, stressdan xoli qilishdir. Loyiha ortida esa Janubiy Koreyada tahsil olgan va xalqaro tajribaga ega tadbirkor — Mokhinur Inomova turibdi.
Bugungi kunda to‘yga tayyorgarlik shunchaki quvonchli tadbir emas, balki ulkan resurs talab qiladigan loyihaga aylangan. The Knot platformasi ma’lumotlariga ko‘ra, juftliklar to‘y rejalashtirish uchun o‘rtacha 12–18 oy vaqt sarflaydi. Bu davrda haftasiga kamida 6 soat faqat tashkiliy masalalar bilan band bo‘lishadi.
O‘zbekistonda vaziyat yanada jiddiyroq. «Yuksalish» harakati o‘tkazgan so‘rovnomaga ko‘ra, mamlakatimizda har to‘rtta to‘ydan bittasi katta qarz evaziga o‘tkazilmoqda. O‘rtacha oylik daromad $500 atrofida bo‘lgan bir paytda, to‘y uchun $10,000–$15,000 sarflash jamiyatning jiddiy moddiy og‘rig‘iga aylangan. Masalan, 2018-yilning o‘zida O‘zbekistondagi to‘ylarga jami $3 milliard dollar sarflangan.
Mohinur Inomova Janubiy Koreyada o‘qish va ishlash davomida texnologiyalar hayotni qanchalik osonlashtirishini ko‘rdi. Ammo o‘z to‘yi arafasida u ham ko‘pchilik kabi «eskicha» tizimning qurboniga aylandi: narxlarning noaniqligi, sifatli xizmat ko‘rsatuvchilarni qidirish va cheksiz stress. Shunda u bir qarorga keldi: To‘y stress manbai emas, balki hayotdagi eng baxtli lahza bo‘lishi kerak.
YorYor qanday yechim beradi?
YorYor — bu to‘y rejalashtirishning barcha bosqichlarini bitta ilovaga jamlagan ekotizimdir. Platforma orqali:
- Vendorlar bazasi: To‘yxona, xonanda, fotograf va boshqa xizmatlarni osongina topish;
- Shaffof narxlar: Yashirin xarajatlarsiz barcha xizmatlar narxini oldindan ko‘rish;
- Raqamli taklifnomalar: Zamonaviy onlayn taklifnomalar tayyorlash;
- To‘yona tizimi: Shaxsiy to‘y saytini yaratish va to‘yonalarni onlayn qabul qilish;
- Iqtisod: Loyiha hisob-kitoblariga ko‘ra, YorYor foydalanuvchiga $3,000 dan ortiq mablag‘ni tejash imkonini beradi.
Loyiha o‘zining dolzarbligi bilan yirik investorlar e’tiborini tortdi. AloqaVentures tomonidan dastlabki $20,000 investitsiya kiritildi va 2025-yilda startap $500,000 ga baholandi. Yaqinda o‘tkazilgan «Taqdimot» loyihasida esa IT Park Ventures va AloqaVenturesdan jami $100,000 miqdorida investitsiya taklifini oldi. Shuningdek, «Google for Startups» dasturi tomonidan loyihaning texnologik salohiyati uchun $100,000 ajratilgani uning xalqaro darajadagi istiqbolidan dalolat beradi.
Bugungi kunda Mokhinur Inomovaga co-founderlar Diyorbek Muxammedov va Samandar Tursunaliyev hamrohlik qilmoqda. Jamoa 2027-yilga borib Markaziy Osiyo bozoriga chiqishni va nafaqat to‘y, balki barcha muhim tadbirlarni raqamlashtirishni maqsad qilgan.
YorYor shunchaki biznes emas, balki o‘zbek to‘y madaniyatini yangi, ongli va zamonaviy bosqichga olib chiquvchi ijtimoiy harakatdir.
